मुंबईचा चेन्नईवर १० गडी राखून विजय; इशान किशनचं नाबाद अर्धशतक Dream11 IPL 2020 UAE MI vs CSK: चेन्नईविरूद्धच्या सामन्यात इशान किशनने केलेल्या धमाकेदार अर्धशतकाच्या बळावर मुंबईने दणदणीत विजय साजरा केला. जसप्रीत बुमराह आणि ट्रेंट बोल्ट यांच्या वेगवान माऱ्यापुढे चेन्नईच्या फलंदाजांनी गुडघे टेकत फक्त ११४ धावा केल्या होत्या. या आव्हानाचा पाठलाग करताना सलामीला आलेल्या इशान किशन-क्विंटन डी कॉक जोडीने नाबाद शतकी भागीदारी करत लक्ष्य पूर्ण केलं. किशनने नाबाद ६८ तर डी कॉकने नाबाद ४६ धावा केल्या आणि मुंबईला १० गडी राखून विजय मिळवून दिला. नाणेफेक जिंकून मुंबईच्या संघाने प्रथम गोलंदाजीचा निर्णय घेतला. फलंदाजीसाठी आलेल्या चेन्नईची सुरूवात खूपच खराब झाली. ऋतुराज गायकवाड (०), अंबाती रायडू (२), जगदीशन (०), फाफ डु प्लेसिस (१) आणि अष्टपैलू रविंद्र जाडेजा (७) हे फलंदाज पॉवरप्लेमध्येच बाद झाले. कर्णधार धोनी संयमी खेळत असतानाच राहुल चहरने धोनीला (१६) झेलबाद करवले. नवख्या सॅम करनने एकाकी झुंज देत संघाला शंभरी पार करून दिली. त्याने ४७ चेंडूत ४ चौकार आणि २ षटकारांच्या मदतीने ५२ धावा केल्या. ट्रेंट बोल्टने ४ तर बुमराह आणि राहुल चहरने २-२ बळी टिपले. नॅथन कुल्टर-नाइलनेही एका फलंदाजाला माघारी धाडलं. Four overs. 18 runs. Four wickets. One maiden. Pure class from Boulty! pic.twitter.com/U7vYS5Mn57 — Mumbai Indians (@mipaltan) October 23, 2020 ११५ धावांच्या माफक आव्हानाचा पाठलाग करताना इशान किशन आणि क्विंटन डी कॉक ही जोडी सलामीला आली. मुंबईकडून IPL इतिहासात पहिल्यांदाच दोन डावखुऱ्या फलंदाजांनी सलामी केली. या दोघांनी CSKच्या गोलंदाजांंचा यथेच्छ समाचार घेतला. इशान किशनने नाबाद अर्धशतक ठोकलं. त्याने ६ चौकार आणि ५ षटकारांच्या मदतीने ३७ चेंडूत ६८* धावा कुटल्या. तर क्विंटन डी कॉकने ५ चौकार आणि २ षटकारांच्या मदतीने ४६* धावा केल्या. या दोघांनी नाबाद शतकी भागीदारी करत संघाला १० गडी राखून विजय मिळवून दिला. रोहित दुखापतग्रस्त. सामन्यात महत्त्वाची बाब म्हणजे नाणेफेकीसाठी रोहित शर्मा अनुपस्थित होता. दुखापतीमुळे रोहितला विश्रांती देण्यात आली. त्याच्या जागी कायरन पोलार्ड टॉससाठी मैदानात आला. रोहितच्या जागी संघात सौरभ तिवारीला स्थान देण्यात आले होते.