सलामीवीर इशान किशनचं अर्धशतक आणि त्याला क्विंटन डी-कॉक व सूर्यकुमार यादव यांनी दिलेली भक्कम साथ या जोरावर मुंबई इंडियन्सने दिल्ली कॅपिटल्सवर ९ गडी राखून विजय मिळवला आहे. प्ले-ऑफचं तिकीट मिळवलेल्या मुंबईने दिल्लीवर मात करत इतर संघांसाठीची शर्यत अधिक रंगतदार केली आहे. १११ धावांच्या आव्हानाचा पाठलाग करण्यासाठी मैदानात उतरलेल्या मुंबई इंडियन्सने आपल्या डावाची धडाकेबाज सुरुवात केली. किशन आणि डी-कॉक यांनी पहिल्या विकेटसाठी ६८ धावांची भागीदारी केली. सलामीची जोडी मुंबईला विजय मिळवून देणार असं वाटत असताना डी-कॉक बाद झाला. परंतू यानंतर इशानने सूर्यकुमारच्या साथीने संघाच्या विजयावर शिक्कामोर्तब केलं. दिल्लीच्या गोलंदाजांचा समाचार घेत इशान किशनने नाबाद ७२ धावांची खेळी केली. आपल्या अर्धशतकी खेळीत किशनने ८ चौकार आणि ३ षटकार लगावले.
त्याआधी कर्णधार रोहित शर्माच्या अनुपस्थितीत कायरन पोलार्डच्या नेतृत्वाखाली खेळणाऱ्या मुंबई इंडियन्स संघाने आपल्या लौकिकाला साजेसा खेळ सुरु ठेवला .प्ले-ऑफचं तिकीट मिळवल्यानंतरही दुबईच्या मैदानावर दिल्लीविरुद्धच्या सामन्यात मुंबई इंडियन्सच्या गोलंदाजांनी भेदक मारा करत दिल्लीला ११० धावांवर रोखलं आहे. दिल्लीचा एकही फलंदाज आज मुंबईच्या गोलंदाजांचा सामना करु शकला नाही. नाणेफेक जिंकत मुंबईचा कर्णधार कायरन पोलार्डने प्रथम गोलंदाजी करण्याचा निर्णय घेतला. स्पर्धेत आपलं आव्हान कायम राखण्यासाठी दिल्लीच्या संघाला विजयाची आवश्यकता होती. परंतू मुंबई इंडियन्सच्या गोलंदाजांनी केलेल्या भेदक माऱ्यासमोर पहिल्या षटकापासून दिल्लीच्या फलंदाजांनी मान टाकायला सुरुवात केली. सलामीवीर शिखर धवन सलग दुसऱ्या सामन्यात शून्यावर बाद झाला. ट्रेंट बोल्टच्या गोलंदाजीवर सूर्यकुमारने धवनचा झेल घेतला. यानंतर अजिंक्य रहाणेच्या जागेवर संधी मिळालेल्या पृथ्वी शॉ देखील अपयशी ठरला, बोल्टच्या गोलंदाजीवर उंच फटका खेळण्याच्या प्रयत्नात पृथ्वी १० धावा काढून बाद झाला.
कर्णधार श्रेयस अय्यर आणि ऋषभ पंत यांनी तिसऱ्या विकेटसाठी ३५ धावांची भागीदारी करत संघाचा डाव सावरण्याचा प्रयत्न केला. दिल्लीची ही जोडी फोडण्यासाठी कर्णधार पोलार्डने राहुल चहरला संधी दिली. चहरनेही आपल्या लेगस्पिनच्या जाळ्यात दिल्लीच्या कर्णधाराला अडकवत संघाला मोठं यश मिळवून दिलं. यानंतर दिल्लीच्या डावाला लागलेली गळती थांबलीच नाही. बुमराह, चहर, बोल्ट, कुल्टर-नाईल यांनी एकामागोमाग एक दिल्लीला धक्के देणं सुरु ठेवलं. स्टॉयनिस, ऋषभ पंत, हर्षल पटेल, शेमरॉन हेटमायर यांनीही फटकेबाजी करण्याच्या प्रयत्नात आपल्या विकेट फेकल्या. मुंबईकडून जसप्रीत बुमराह आणि ट्रेंट बोल्ट यांनी प्रत्येकी ३-३ तर कुल्टर-नाईल आणि चहर यांनी १-१ बळी घेतला.
मुंबईची दिल्लीवर ९ गडी राखून मात, ४७ चेंडूत ८ चौकार-३ षटकारांसह इशान किशनच्या नाबाद ७२ धावा
नॉर्जच्या गोलंदाजीवर डी-कॉक दुर्दैवी पद्धतीने त्रिफळाचीत, २६ धावांची केली खेळी
पहिल्या विकेटसाठी इशान किशनसोबत ६८ धावांची भागीदारी
इशान किशन आणि क्विंटन डी-कॉक जोडीची अर्धशतकी भागीदारी
३ बळी घेत केला महत्वाचा विक्रम, दिग्गज गोलंदाजांच्या पंगतीत मिळवलं स्थान. वाचा सविस्तर
दिल्लीला ११० धावांवर रोखण्यात मुंबईला यश, अखेरच्या चेंडूवर चोरटी धाव काढताना रबाडा धावबाद
दिल्लीची २० षटकांत ९ बाद ११० पर्यंत मजल, मुंबईला विजयासाठी १११ धावांचं आव्हान
ट्रेंट बोल्टच्या गोलंदाजीवर षटकार खेचत कगिसो रबाडाने राखली संघाची लाज
ट्रेंट बोल्टच्या गोलंदाजीवर कृणाल पांड्याने घेतला भन्नाट झेल, १२ धावा काढून आश्विन बाद
दिल्लीचा आठवा गडी माघारी परतला
कुल्टर-नाईलच्या गोलंदाजीवर कृणाल पांड्याने घेतला झेल, दिल्लीचा सातवा गडी बाद
११ धावा काढून हेटमायर बाद
हर्षल पटेल जसप्रीत बुमराहच्या गोलंदाजीवर बाद, दिल्लीला सहावा धक्का
टप्पा पडून आत आलेल्या बुमराहच्या चेंडूवर पंत फसला
२१ धावा काढून पंत बाद, एकाच षटकात बुमराहचे दोन बळी
जसप्रीत बुमराहच्या गोलंदाजीवर डी-कॉकने घेतला झेल, २ धावा काढून स्टॉयनिस बाद
राहुल चहरच्या लेगस्पिनच्या जाळ्यात अडकला श्रेयस अय्यर, यष्टीरक्षक क्विंटन डी-कॉकची सुरेख कामगिरी
अय्यरच्या २९ चेंडूत २५ धावा
मुंबईच्या गोलंदाजांचा संयमी सामना करत गाठला ५० धावांचा टप्पा
ट्रेंट बोल्टच्या गोलंदाजीवर दोन चौकार लगावत पृथ्वीची चांगली सुरुवात, परंतू मोठा फटका खेळण्याच्या प्रयत्नात पृथ्वी फसला
यष्टीरक्षक क्विंटन डी-कॉकने घेतला झेल, बोल्टला दुसरा बळी. १० धावा काढत पृथ्वी बाद
IPL 2020 : मुंबई इंडियन्स संघानं नाणेफेक जिंकून प्रथम गोलंदाजी करण्याचा निर्णय घेतला आहे. या निर्णायक सामन्यात मुंबई आणि दिल्लीनं आपल्या संघात महत्वाचे बदल केले आहेत.... वाचा सविस्तर
ट्रेंट बोल्टच्या गोलंदाजीवर सूर्यकुमार यादवने घेतला भन्नाट कॅच
असा असेल दिल्लीचा अंतिम ११ जणांचा संघ
जयंत यादव आणि कुल्टर-नाईलला संघात स्थान
संघात दोन बदल, हार्दिक पांड्या-जेम्स पॅटिन्सनला विश्रांती