गतविजेत्या मुंबई इंडियन्सने आयपीएलच्या तेराव्या हंगामात आपला विजयी परंपरा कायम राखली आहे. शारजाच्या मैदानावर खेळवण्यात आलेल्या सामन्यात मुंबई इंडियन्सने सनराईजर्स हैदराबादवर ३४ धावांनी मात केली. २०९ धावांचं आव्हान घेऊन मैदानात उतरलेला हैदराबादचा संघ १७४ धावांपर्यंतच मजल मारु शकला. हैदराबादकडून कर्णधार डेव्हिड वॉर्नरने ६० धावांची खेळी करत आक्रमक खेळी केली. परंतू दुसऱ्या बाजूने त्याला योग्य साथ मिळाली नाही. मुंबईच्या गोलंदाजांनीही या सामन्यात टिच्चून मारा करत हैदराबादला फार मोठे फटके खेळण्याची संधी दिली नाही. जॉनी बेअरस्टो आणि डेव्हिड वॉर्नर जोडीने हैदराबादच्या डावाची आश्वासक सुरुवात केली. ट्रेंट बोल्टने बेअरस्टोला माघारी धाडत मुंबईला पहिलं यश मिळवून दिलं. यानंतर मनिष पांडे आणि वॉर्नर यांनी पुन्हा एकदा भागीदारी करत संघाचा डाव सावरला. ही जोडी मैदानात स्थिरावणार असं वाटत असतानाच मनिष पांडे जेम्स पॅटिन्सनच्या गोलंदाजीवर माघारी परतला. त्याने ३० धावांची खेळी केली. यानंतर हैदराबदच्या मधल्या फळीतल्या फलंदाजांनी निराशा केली. एकीकडे कर्णधार वॉर्नर फटकेबाजी करत असतानाही केन विल्यमसन आणि प्रियम गर्ग स्वस्तात माघारी परतले. यानंतर कर्णधार डेव्हिड वॉर्नरही पॅटिन्सनच्या गोलंदाजीवर इशान किशनकडे झेल देत माघारी परतला. त्याने ४४ चेंडूत ५ चौकार आणि २ षटकारांसह ६० धावा केल्या. यानंतर अब्दुल समद आणि अभिषेक शर्मा या युवा फलंदाजांनी फटकेबाजी करत संघाला विजय मिळवून देण्याचा प्रयत्न केला. परंतू त्यांचे प्रयत्न तोकडेच पडले. मुंबई इंडियन्सकडून ट्रेंट बोल्ट, जेम्स पॅटिन्सन आणि जसप्रीत बुमराहने यांनी प्रत्येकी २-२ तर कृणाल पांड्याने एक बळी घेतला. त्याआधी, क्विंटन डी-कॉकचं अर्धशतक आणि अखेरच्या षटकांत कायरन पोलार्ड व पांड्या बंधूंनी केलेल्या फटकेबाजीच्या जोरावर मुंबई इंडियन्सने हैदराबादविरुद्धच्या सामन्यात २०८ धावांपर्यंत मजल मारली. भुवनेश्वर कुमारच्या अनुपस्थितीत खेळणाऱ्या हैदराबादच्या गोलंदाजांनी सुरुवातीच्या षटकांत चांगला मारा केला. परंतू अखेरच्या षटकांत मुंबईच्या धावगतीवर अंकुश ठेवण्यात ते अपयशी ठरले. डी-कॉकच्या ६७ धावा हे मुंबईच्या डावाचं वैशिष्ट्य ठरलं. मुंबई इंडियन्सची सुरुवात चांगली झाली नाही. संदीप शर्माच्या पहिल्याच षटकात षटकार मारणारा कर्णधार रोहित शर्मा लगेचच झेलबाद झाला. यानंतर सूर्यकुमार यादव आणि क्विंटन डी-कॉक यांनी छोटेखानी भागीदारी करत संघाचा डाव सावरला. दोन सामन्यांतील अपयशानंतर सूर्यकुमारला चांगला सूर गवसला होता. परंतू सिद्धार्थ कौलच्या गोलंदाजीवर स्कूपचा फटका खेळण्याच्या प्रयत्नात सूर्यकुमार बाद झाला, त्याने २७ धावा केल्या. यानंतर इशान किशन आणि क्विंटन डी-कॉक जोडीने महत्वपूर्ण भागीदारी रचत मुंबईच्या डावाला आकार दिला. दोन्ही फलंदाजांनी ७८ धावांची भागीदारी केल्यामुळे मुंबईचा डाव सावरला. क्विंटन डी-कॉकने यादरम्यान आपलं अर्धशतकही साजरं केलं. परंतू राशिद खानच्या गोलंदाजीवर मोठा फटका खेळण्याच्या प्रयत्नात डी-कॉक माघारी परतला. त्याने ३९ चेंडूत ४ चौकार आणि ४ षटकारांसह ६७ धावा केल्या. यानंतर इशान किशनही ठराविक अंतराने संदीप शर्माच्या गोलंदाजीवर माघारी परतला. यानंतर हार्दिक पांड्या आणि कायरन पोलार्ड जोडीने फटकेबाजी करत मुंबईला डेथ ओव्हर्समध्ये चांगल्या धावा काढून दिल्या. सिद्धार्थ कौलने अखेरच्या षटकांत यॉर्कच चेंडू टाकत हार्दिक पांड्याला माघारी धाडलं. परंतू शारजामधील लहान मैदानाचा चांगला वापर करत मुंबईच्या फलंदाजांनी चौफेर फटकेबाजी करत मुंबईला २०८ धावांचा टप्पा गाठून दिला. हैदराबादकडून संदीप शर्मा आणि सिद्धार्थ कौलने २ तर राशिद खान १ बळी घेतला.
