मधल्या फळीतल्या फलंदाजांनी केलेल्या हाराकिरीमुळे हैदराबादला हातात आलेल्या सामन्यावर पाणी सोडावं लागलं आहे. बंगळुरुच्या गोलंदाजांनी मोक्याच्या क्षणी हैदराबादच्या डावाला खिंडार पाडत सामन्यात दमदार पुनरागमन केलं. एका क्षणाला हातातून गमावलेला सामना बंगळुरुने १० धावांनी जिंकला. युजवेंद्र चहलने एकाच षटकात जॉनी बेअरस्टो आणि विजय शंकरला माघारी धाडत बंगळुरुच्या विजयाची पायाभरणी केली. हैदराबादकडून बेअस्टोने धडाकेबाज अर्धशतक झळकावलं, पण त्याची खेळी व्यर्थ गेली. बंगळुरुने विजयासाठी दिलेल्या आव्हानाचा पाठलाग करताना हैदराबादची सुरुवात अडखळत झाली. कर्णधार वॉर्नर धावबाद होऊन माघारी परतला. यानंतर मनिष पांडे आणि जॉनी बेअरस्टो जोडीने महत्वपूर्ण भागीदारी करत संघाचा डाव सावरला. दोन्ही फलंदाजांनी मैदानात स्थिरावल्यानंतर फटकेबाजी सुरुवात केली. पांडे-बेअरस्टो जोडी मैदानात चमत्कार घडवणार असं वाटत असतानाच पांडे माघारी परतला. यानंतरही बेअरस्टोने एक बाजू लावून धरत फटकेबाजी सुरु ठेवली. बंगळुरुच्या गोलंदाजांचा समाचार घेत बेअरस्टोने ४३ चेंडूत ६ चौकार आणि २ षटकारांनिशी ६१ धावा केल्या. युजवेंद्र चहलने एकाच षटकात बेअरस्टो आणि विजय शंकरला माघारी धाडत हैदराबादला धक्का दिला. यानंतर हैदराबादच्या डावाला गळती लागली. मधल्या फळीतला एकही फलंदाज मैदानावर फारसा स्थिरावू शकला नाही. अनेक फलंदाजांनी हाराकिरी करत विकेट फेकल्यामुळे बंगळुरुच्या संघाला विजय सोपा झाला. युजवेंद्र चहलने ३ बळी घेत संघाच्या विजयात मोलाची भूमिका बजावली. त्याला नवदीप सैनी आणि शिवम दुबे यांनी २-२ तर स्टेनने १ बळी घेत चांगली साथ दिली. त्याआधी, सलामीवीर देवदत पडीकल आणि फिंच यांनी पहिल्या विकेटसाठी केलेल्या ९० धावांच्या भागीदारीमुळे रॉयल चॅलेंजर्स बंगळुरुने पहिल्या सामन्यात १६३ धावा केल्या. नाणेफेक जिंकून प्रथम गोलंदाजी करण्याचा डेव्हिड वॉर्नरचा निर्णय काहीसा फसला. पदार्पणाचा आयपीएल सामना खेळणाऱ्या देवदत पडीकलने फिंचच्या साथीने हैदराबादच्या गोलंदाजांचा समाचार घेतला. पडीकलने पहिल्याच सामन्यात अर्धशतकी खेळी करत संघाला चांगली सुरुवात दिली. परंतू सलामीची जोडी माघारी परतल्यानंतर RCB च्या मधल्या फळीने निराशा केल्यामुळे संघाला मोठी धावसंख्या उभारता आली नाही. पडीकल आणि डिव्हीलियर्स यांनी सामन्यात अर्धशतकं झळकावली. पडीकल हा RCB च्या पहिल्या डावातला हिरो ठरला. स्थानिक स्पर्धांमधील अनुभवाच्या जोरावर पडीकलने आश्वासक फलंदाजी केली. ४२ चेंडूत ८ चौकारांनिशी त्याने ५६ धावा केल्या. दुसऱ्या बाजूने फिंचनेही त्याला चांगली साथ दिली. विजय शंकरने पडीकलला आणि अभिषेक शर्माने फिंचला माघारी धाडत RCB ची जोडी फोडली. यानंतर मधल्या षटकांमध्ये बंगळुरुची धावगती पुन्हा एकदा मंदावली. विराट-एबी डिव्हीलियर्स यांसारखे अनुभवी फलंदाज असतानाही हव्या त्या गतीने धावा झाल्या नाहीत. विराट कोहलीही मोठा फटका खेळण्याच्या प्रयत्नात नटराजनच्या गोलंदाजीवर सीमारेषेवर राशिद खानकडे झेल देऊन माघारी परतला. त्याने १४ धावा केल्या. दुसऱ्या बाजूने डिव्हीलियर्सने अखेरपर्यंत मैदानात तळ ठोकून फटकेबाजी करण्याचा प्रयत्न केला. शिवम दुबेने त्याला चांगली साथ दिली. डिव्हीलियर्सने आपल्या लौकिकाला साजेसा खेळ करत फटकेबाजी करुन आपलं अर्धशतक साजरं केलं. त्याने ५१ धावांची खेळी केली. अखेरच्या षटकात चोरटी धाव घेताना तो धावबाद झाला. हैदराबादकडून विजय शंकर, अभिषेक शर्मा आणि टी. नटराजन यांनी प्रत्येकी १-१ बळी घेतला.
