निर्धारित वेळेत कोलकाता विरुद्ध हैदराबाद यांच्यातील सामना बरोबरीत सुटल्यामुळे अबु धाबीच्या मैदानावर सुपरओव्हरवर सामन्याचा निकाल लावण्यात आला. कोलकात्याने २० षटकांत १६३ धावांचा पल्ला गाठला होता. या आव्हानाचा पाठलाग करताना हैदराबादने सामना बरोबरीत सोडवला. त्यानंतर झालेल्या सुपर ओव्हरमध्ये IPL 2020 चा पहिलाच सामना खेळणाऱ्या लॉकी फर्ग्युसनने केवळ २ धावा देत २ बळी घेऊन हैदराबादचा डाव संपवला. यानंतर मॉर्गन-दिनेश कार्तिक जोडीने विजयाची औपचारिकता पूर्ण केली. या विजयासह KKR ने आयपीएलच्या इतिहासात सुररओव्हरवर अपयशी ठरण्याची आपली मालिका खंडीत केली आहे. आतापर्यंतच्या इतिहासात कोलकाता नाईट रायडर्सने ३ वेळा सुपरओव्हर खेळल्या होत्या.पण या तिन्ही सामन्यांमध्ये KKR ला पराभवाचा सामना करावा लागला होता. KKR चा सुपरओव्हरवरचा हा पहिलाच विजय ठरला आहे. KKR in Super overLost vs RR (2009)Lost vs RR (2014)Lost vs DC (2019)Won vs SRH (Today)*#KKRvSRH— CricBeat (@Cric_beat) October 18, 2020 १६४ धावांच्या आव्हानाचा पाठलाग करताना सलामीवीर केन विल्यमसन आणि बेअरस्टो यांनी अर्धशतकी भागीदारी केली. विल्यमसन २९ धावांवर बाद झाला. क्रमवारीत वर आलेला प्रियम गर्गदेखील ४ धावावर माघारी गेला. जॉनी बेअरस्टोने चांगली सुरूवात केली होती. पण तो ३६ धावा काढून बाद झाला. मधल्या फळीतील मनिष पांडे (६) आणि विजय शंकरने (७) संघाची निराशा केली. नवख्या अब्दुल समदने १५ चेंडूत २३ धावा करत हैदराबादसाठी विजयाच्या आशा जागवल्या. त्यानंतर शेवटच्या षटकात कर्णधार डेव्हिड वॉर्नरने तीन चौकार ठोकले पण सामना बरोबरीत सुटला. वॉर्नरने ५ चौकारांसह नाबाद ४७ धावा केल्या. IPL 2020चा पहिलाच सामना खेळणाऱ्या फर्ग्युसनने १५ धावांत ३ बळी टिपले.