एकाकी जीवन कंठत असलेल्या फिरस्त्या वृद्ध व्यक्तीचा गोळी घालून खून करण्यात आल्याचा प्रकार गुरुवारी उघडकीस आला. नारायण रावबा देसाई (वय ७२) असे खून झालेल्या व्यक्तीचे नाव आहे. याबाबत जुना राजवाडा पोलीस ठाण्यामध्ये गुन्हा दाखल झाला आहे. नारायण देसाई ही व्यक्ती गेल्या काही काळापासून अर्धशिवाजी पुतळय़ाजवळील वांगी बोळ परिसरात राहात होती. एकाकी जीवन जगणाऱ्या या व्यक्तीची पत्नी सहा वर्षांपूर्वी मरण पावली होती. तर मुलगी विवाहित आहे. बंधू नामदेव देसाई हे शेतकरी सहकारी संघामधील सेवानिवृत्त कर्मचारी आहेत. त्यांनीच आज पोलीस ठाण्यामध्ये फिर्याद दिली आहे. नामदेव देसाई यांना फुलेवाडी येथील राजेंद्र डावरे या भाच्याचा फोन आला होता. मामा नारायण हे निवृत्ती चौक परिसरात जखमी अवस्थेत पडले असल्याची माहिती त्याने दिली होती. त्यावर नामदेव देसाई यांनी घटनास्थळी जाऊन पाहिले असता भाऊ नारायण मृत झाल्याचे दिसले. मृताच्या कपाळ व कानाच्या पाठीमागील बाजूस जखम होऊन रक्त येत असल्याचे दिसले. त्यानंतर सीपीआर इस्पितळातील डॉक्टरांनी शवविच्छेदन केले असता गोळी घातल्याने मृत्यू झाल्याचे सांगितले. तथापि कोणत्या कारणामुळे खून झाला असावा याचा शोध पोलीस घेत आहेत.
