कोल्हापूर : राधानगरी-भुदरगडचे मतदार संघाचे माजी आमदार नामदेवराव शंकरराव भोईटे (वय ७९) यांचे मंगळवारी येथील अस्टर आधार हॉस्पिटलमध्ये प्रदीर्घ आजारानंतर निधन झाले. जिल्ह्याच्या राजकीय, सामाजिक, शैक्षणिक, सहकार क्षेत्रात भोईटे यांनी उल्लेखनीय कामगिरी केली होती. पालकरवाडी (ता. राधानगरी) येथे सामान्य कुटुंबात भोईटे यांचा जन्म झाला. ते शिक्षकी पेशात असले तरी त्यांचा ओढा राजकारणाकडे होता. त्यातून ते राधानगरी पंचायत समितीवर निवडून आले. सभापती म्हणून त्यांनी उल्लेखनीय काम केले. पुढे ते काँग्रेस पक्षाकडून जिल्हा परिषदेवर निवडून गेल्यावर अभ्यासू सदस्य अशी प्रतिमा त्यांनी निर्माण केली. त्यांनी राधानगरी-भुदरगड मतदार संघात काँग्रेस पक्षाकडे उमेदवारी मागितली होती. ती न मिळाल्याने १९९५ त्यांनी अपक्ष म्हणून निवडणूक लढवली. तेव्हा राज्यात युतीचे सरकार असल्याने त्यांनी शिवसेनेला पाठिंबा दिला. शरद पवार यांनी राष्ट्रवादी काँग्रेसची स्थापना केल्यानंतर ते पवारांचे निष्ठावंत कार्यकर्ते म्हणून ओळखले जाऊ लागले. शिक्षण क्षेत्रात त्यांना रुची असल्याने मतदार संघात त्यांनी अनेक शिक्षण संस्था निर्माण केल्या. मुदाळ येथील हुतात्मा वारके सहकारी सूतगिरणीचे ते अध्यक्ष होते.