कोल्हापुरात मुख्यमंत्री देवेंद्र फडणवीसांचे रसरशीत भाषण; फुटबॉलप्रेम, कुस्ती परंपरा, सांस्कृतिक वैभवाचा दिलखुलास गौरव!

तेव्हा मिसळ आज तांबडा पांढरा

भाषणाची सुरुवात करताना त्यांनी कोल्हापूरच्या प्रसिद्ध तांबड्या आणि पांढऱ्या रस्शाची आठवण काढताच संपूर्ण सभागृहात आनंदाची लकेर उमटली. कोल्हापूर महापालिका निवडणुकी वेळी त्यांनी कोल्हापूरच्या प्रसिद्ध मिसळचा आस्वाद घेतला होता. तर आज त्यांनी तांबड्या पांढऱ्याची आठवण काढली.​

कोल्हापुरातील मेस्सी!

कोल्हापूरच्या क्रीडा संस्कृतीचा विशेष उल्लेख करताना मुख्यमंत्री म्हणाले की, या मातीत खेळाविषयी विलक्षण वेडेपणा आहे. एकीकडे फिफा विश्वचषक स्पर्धेत फुटबॉलचा जादूगार मेस्सी खेळत होता, तर हुबेहूब त्याच वेळी कोल्हापूरच्या मैदानांवरही येथील स्थानिक ‘मेस्सी’ आपल्या खेळाची जादू दाखवत होते. हा योगायोग कोल्हापूरच्या अफाट फुटबॉल प्रेमाची साक्ष देणारा आहे, असे गौरवोद्गार त्यांनी काढले.

खेळावर अफाट प्रेम

कोल्हापुरातील क्रिकेट, फुटबॉल आणि हॉकीच्या अफाट प्रेमाचा त्यांनी सविस्तर गौरव केला. तसेच, महाराष्ट्राची पंढरी मानल्या जाणाऱ्या कोल्हापुरी कुस्तीचा आणि मल्लांच्या परंपरेचा सन्मान करत या मातीने देशाला आणि जगाला महान मल्ल दिल्याचे आवर्जून सांगितले.

नामवंतांची मांदियाळी

​केवळ खेळाच नव्हे, तर कोल्हापूरच्या समृद्ध सांस्कृतिक आणि कलात्मक वारशावरही त्यांनी प्रकाश टाकला. कोल्हापूरच्या ऐतिहासिक गायन परंपरेचा गौरव करताना संगीत सृष्टीतील योगदानाची त्यांनी प्रशंसा केली. तसेच चित्रपट आणि नाट्य क्षेत्रातील संगीतसूर्य केशवराव भोसले, बाबुराव पेंटर, भालजी पेंढारकर, पंडित विष्णू दिगंबर पलूसकर, सुधीर फडके, वामनराव सडोलीकर, शाहीर पिराजी सरनाईक, अरुण सरनाईक, रमेश देव, ऑस्कर विजेत्या वेशभूषाकार भानू अथय्या आदी नामवंत मान्यवरांचा नामोल्लेख करत कोल्हापूर ही महाराष्ट्राची सांस्कृतिक राजधानी असल्याचे पुन्हा एकदा अधोरेखित केले. मुख्यमंत्र्यांच्या या सर्वसमावेशक आणि जिव्हाळ्याच्या भाषणामुळे कोल्हापूरकरांच्या सांस्कृतिक अस्मितेला नवी ऊर्जा मिळाली.