इचलकरंजीत राष्ट्रवादीपाठोपाठ काँग्रेसचेही विजयाचे खाते

इचलकरंजी नगरपालिका सार्वत्रिक निवडणुकीत प्रारंभापासून धक्क्यावर धक्के बसू लागले आहेत. अर्ज माघारीच्या दुसऱ्या दिवशी राष्ट्रीय काँग्रेसने बिनविरोध विजयाचे खाते उघडले आहे. प्रभाग १९ मधून राष्ट्रीय काँग्रेसच्या अधिकृत उमेदवार सौ. ध्रुवती सदानंद दळवाई यांच्या विरोधात कोणीच उमेदवार उरला नसल्याने त्यांची बिनविरोध निवड झाली आहे. दळवाई यांच्या विरोधातील भारतीय जनता पार्टीच्या अधिकृत उमेदवार सौ. सीमा कांबळे यांनी माघार घेतली आहे.

प्रभाग १९ मध्ये बिनविरोध निवडीसाठी प्रारंभापासूनच तडजोडीचे प्रयत्न सुरू होते. अखेर आज त्याला यश येऊन सौ. कांबळे यांनी आपला उमेदवारी अर्ज माघार घेतल्याने सौ. दळवाई यांना कोणीच विरोधक उरलेला नाही. त्यामुळे दळवाई यांच्या बिनविरोध निवडीची आता केवळ औपचारिकता बाकी आहे. बिनविरोध निवडीनंतर दळवाई समर्थकांनी गुलालाची उधळण आणि फटाक्यांची आतषबाजी करीत जल्लोष साजरा केला. तर शहर काँग्रेस भवन येथे माजी आमदार प्रकाश आवाडे यांच्या हस्ते सौ. दळवाई आणि गबान यांचा सत्कार करण्यात आला. या प्रसंगी शहर काँग्रेसचे अध्यक्ष प्रकाश मोरे, सतीश डाळ्या, सुनील पाटील आदी उपस्थित होते.