भरधाव कार विहिरीमध्ये कोसळून दोन महिलांचा मृत्यू

जालना : भोकरदन तालुक्यातील वालसावंगी – पारध रस्त्यावरील पद्मावती गावाजवळ भरधाव कार विहिरीत पडून दोन महिलाचा मृत्यू झाला. शुक्रवारी रात्री ही दुर्घटना घडली. सुलताना बेगम जियाऊल्ला खान(४७) आणि अख्तरबी(७५ ) अशी मरण पावलेल्या महिलांची नावे आहेत. यापैकी एक महिलेचा विहिरीत बुडून मरण पावली तर दुसरी रुग्णालयात उपचार सुरु असताना मरण पावली.त्या दोघीही भोकरदन तालुक्यातील धावडा गावातील रहिवाशी होत्या.अबुताला जियाऊल्लाखान आणि अल्तमशखान हे या दुर्घटनेतून बचावले असून त्यांच्यावर रुग्णालयात उपचार करण्यात येत आहेत. विहिरीमध्ये मोठ्या प्रमाणात पाणी असल्यामुळे चार चाकी वाहन विहिरीबाहेर काढण्यासाठी प्रशासनाला बारा तास परिश्रम घ्यावे लागले. शनिवारी सकाळी विहिरीतून चार चाकी वाहन बाहेर काढण्यात आले.