कोल्हापुरात गर्भाशयाची गुंतागुंतीची शस्त्रक्रिया यशस्वी

या शस्त्रक्रियेद्वारे गर्भाशयातील ६.७ किलो वजनाचे तंतुमय गर्भाशय यशस्वीरीत्या काढण्यात आले असल्याची माहिती देण्यात आली.

कोल्हापूर

October 12, 2025 07:28 IST

kolhapur doctors remove 6kg uterine fibroid in rare surgery medical success in maharashtra

दुर्मीळ तंतुमय गर्भाशयाचे शस्त्रक्रियेने निष्कासन केल्याची माहिती पत्रकार परिषदेत देण्यात आली. (छायाचित्र:लोकसत्ता टीम)

कोल्हापूर : येथील मातृबल रुग्णालयामध्ये तंतुमय गर्भाशयाची (फायब्रॉइड्स अटर्स) अत्यंत दुर्मीळ आणि गुंतागुंतीची शस्त्रक्रिया पार पडली. या शस्त्रक्रियेद्वारे गर्भाशयातील ६.७ किलो वजनाचे तंतुमय गर्भाशय यशस्वीरीत्या काढण्यात आले असल्याची माहिती देण्यात आली.

या रुग्णाला गेल्या आठ महिन्यांपासून पोटात जडपणा, सतत वाढणारी सूज, पोटदुखी, तसेच श्वास घेण्यास त्रास अशी गंभीर लक्षणे जाणवत होती. रुग्णाच्या गर्भाशयात अत्यंत मोठा ट्युमर विकसित होऊन त्याने पूर्ण पोट व्यापले होते.

आवश्यक तपासण्या केल्यानंतर मातृबल रुग्णालयाच्या अनुभवी तज्ज्ञ डॉक्टरांच्या पथकातील डॉ. एम. जे. नागांवकर, डॉ. रूपा नागांवकर, डॉ. नंदन नागांवकर, डॉ. सायली नागांवकर, भूलतज्ज्ञ डॉ. शंकर आमणगी, डॉ. विश्वास जोशी, डॉ. रमेश कुर्ले यांच्या चमूने शस्त्रक्रिया यशस्वीरीत्या पार पाडली. ही शस्त्रक्रिया वैद्यकीय क्षेत्रात एक उल्लेखनीय कामगिरी म्हणून नोंदली जात आहे.

हेही वाचा

CJI Bhushan Gavai : सरन्यायाधीश गवई यांचा महत्वाचा निर्णय! भर न्यायालयात केली घोषणा, ‘आता सर्वोच्च न्यायालयात…’

शस्त्रक्रियेदरम्यान डॉक्टरांनी पाहिले, की फायब्रॉईड अतिशय प्रचंड आकाराचे असून, आतड्यांवर, मूत्राशयावर व इतर अंतर्गत अवयवांवर दाब आणत होते. अतिशय काळजीपूर्वक आणि कौशल्यपूर्णरीत्या फायब्रॉईड वेगळे करून पूर्णपणे काढण्यात आले. शस्त्रक्रियेनंतर रुग्णाची प्रकृती स्थिर असून, सध्या पूर्णपणे बरी आहे.

वैद्यकीय आकडेवारीनुसार, अशा प्रकारचे फायब्रॉईड जगभरात अत्यंत दुर्मीळ आहेत. उपलब्ध नोंदीनुसार, हे जगातील ११ वे, भारतातील आठवे सर्वांत मोठे फायब्रॉईड, तसेच महाराष्ट्रातील तिसरे आणि पश्चिम महाराष्ट्रातून नोंदवलेले पहिले प्रकरण असल्याचे आढळून आले आहे.

या यशस्वी शस्त्रक्रियेबद्दल डॉ. एम. जे. नागांवकर यांनी सांगितले, की अशा प्रकारच्या प्रकरणात शस्त्रक्रिया करणे अत्यंत आव्हानात्मक असते. फायब्रॉईडचा आकार आणि त्याचे पोटातील इतर अवयवांशी असलेले निकट संबंध लक्षात घेता अत्यंत सूक्ष्म नियोजन आणि समन्वयाची आवश्यकता होती. आमच्या संपूर्ण टीमच्या समन्वयामुळे हे यश शक्य झाले.

डॉ. रूपा नागांवकर म्हणाल्या, ‘महिलांमध्ये फायब्रॉईड हा एक सर्वसाधारण विकार असला, तरी काही वेळा ते प्रचंड आकाराचे होऊ शकतात. वेळेवर निदान आणि योग्य उपचार केल्यास अशा गुंतागुंती टाळता येतात. महिलांनी नियमित आरोग्य तपासणी करणे अत्यावश्यक आहे.’

या शस्त्रक्रियेमुळे मातृबल हॉस्पिटल, कोल्हापूर येथील डॉक्टरांचे कौशल्य, तांत्रिक प्रगत सुविधा आणि टीमवर्क यांचा आणखी एक उत्तम नमुना समोर आला आहे. हॉस्पिटल प्रशासनाने सांगितले, की रुग्णालयात अत्याधुनिक तंत्रज्ञानासह उच्च दर्जाची सुविधा उपलब्ध असून, अशा गुंतागुंतीच्या शस्त्रक्रिया सुरक्षित आणि यशस्वीपणे पार पाडल्या जात आहे. या यशस्वी शस्त्रक्रियेने मातृबल हॉस्पिटलने पुन्हा एकदा वैद्यकीय क्षेत्रात मानाचा तुरा मिळवला आहे आणि कोल्हापूर तसेच पश्चिम महाराष्ट्रासाठी ही एक अभिमानाची बाब ठरली आहे.

अशा प्रकारच्या प्रकरणात शस्त्रक्रिया करणे अत्यंत आव्हानात्मक असते. फायब्रॉईडचा आकार आणि त्याचे पोटातील इतर अवयवांशी असलेले निकट संबंध लक्षात घेता अत्यंत सूक्ष्म नियोजन आणि समन्वयाची आवश्यकता होती. आमच्या संपूर्ण टीमच्या समन्वयामुळे हे यश शक्य झाले.

पत्रकार परिषदेत ज्येष्ठ स्त्रीरोग आणि प्रसूतितज्ज्ञ डॉ. जनार्दन नागांवकर, डॉ. एम. जे. नागांवकर, डॉ. रूपा नागांवकर, डॉ. नंदन नागांवकर आणि डॉ. सायली नागांवकर, डॉ. विश्वास जोशी उपस्थित होते.