कोल्हापुरात आवाज मर्यादेचे उल्लंघन करणाऱ्या मंडळावर कारवाई करणार; गणेश मूर्ती भाविकांसाठी खुली

ध्वनी प्रदूषण मोजणाऱ्या यंत्राद्वारे आवाजाची पातळी तपासली जात असून नियम मोडणाऱ्या मंडळांवर गुन्हे दाखल केले जातील असे त्यांनी सांगितले. ध्वनी प्रदूषणामुळे नागरिकांना आणि विशेषतः रुग्ण व ज्येष्ठांना होणारा त्रास टाळण्यासाठी नियमांचे पालन करणे बंधनकारक असल्याचे त्यांनी स्पष्ट केले आहे.

शिवाजी चौक परिसरात असलेली २१ फुटी गणेश मूर्ती सोमवारी रात्री भाविकांसाठी खुली झाली. पहिला हार घालण्याचा मान अंजुम पठाण यांना मिळाला. आमदार चंद्रदीप नरके, मंडळाचे संस्थापक अध्यक्ष नंदकुमार वळंजू, प्रसाद वळंजू, सुहास भेंडे, डॉ. संतोष बेनाडे आदी उपस्थित होते.

दरम्यान, गणरायाचे आगमन झाल्यानंतर शहरातील मंडपांमध्ये गणेश मूर्ती पाहण्यासाठी भाविकांची गर्दी होऊ लागली आहे. लहान मुलांपासून ते ज्येष्ठांपर्यंत सर्वजण आकर्षक मूर्ती, सजावट पाहण्यासाठी मंडळांना भेटी देत आहेत. तर दुसरीकडे मंडळांनी आता प्रत्यक्ष गणेशोत्सवातील आकर्षक देखावे तयार करण्यासाठी नियोजन सुरू केले आहे. कारागिरांच्या मदतीने मंडपात देखाव्यांची उभारणी वेगाने सुरू आहे, पुढील काही दिवसांत सर्व देखावे पूर्ण करून भाविकांसाठी खुले करण्याचे नियोजन आहे. यंदाच्या उत्सवात सामाजिक संदेश देणारे आणि आकर्षक देखावे पाहण्याची उत्सुकता नागरिकांमध्ये वाढली आहे.