पुणे सातारा महामार्गावर वाहनांचा महापूर; मोठी वाहतूक कोंडी

काही किलोमीटरपर्यंत वाहनांच्या रांगा लागल्या आहेत. खंबाटकी घाट व बोगद्याजवळही वाहने वाढल्याने संथ गतीने वाहतूक सुरू आहे.
आनेवडी टोल भरण्यासाठी वाहनांच्या लांब रांगा लागल्या होत्या. टोलनाक्यावरून वाहने पुढे जाण्यास उशीर होत असल्याने त्याचा परिणाम मागील वाहतुकीवर झाला.

शिरवळ, सातारा,शेंद्रे, नागठाणे, काशीळ कराड पर्यंत वाहतूक कोंडी झाली आहे. त्यामुळे काही किलोमीटरपर्यंत वाहनांच्या रांगा वाढल्या. नवीन कात्रज बोगद्याजवळही वाहनांची संथ गती दिसून आली.वाहतूक कोंडीत अडकलेल्या प्रवाशांना मोठा मनस्ताप सहन करावा लागत आहे. अनेक कुटुंबे लहान मुलांसह प्रवास करत आहेत. कडक उन्हाळ्याचा सर्वांना त्रास सहन करावा लागत आहे.

काही वाहनचालकांनी समाज माध्यमांवर चित्रफिती आणि छायाचित्रे प्रसारीत करत प्रशासनावर नाराजी व्यक्त केली. पुणे-सातारा कोल्हापूर महामार्गावरील इतर काही ठिकाणीही अशीच परिस्थिती निर्माण झाल्याची माहिती समोर आली आहे. विशेषतः टोल नाके, घाट परिसर आणि अरुंद मार्गांवर वाहनांची मोठी गर्दी झाल्याने वाहतुकीचा वेग मंदावला.

दरम्यान, पुढील काही दिवस सुट्ट्या असल्याने वाहतूक आणखी वाढण्याची शक्यता व्यक्त केली जात आहे. त्यामुळे प्रशासनाने नागरिकांना शक्य असल्यास पर्यायी मार्गांचा वापर करण्याचे आणि प्रवासासाठी अतिरिक्त वेळ गृहीत धरण्याचे आवाहन केले आहे. वाहतूक कोंडीमुळे खासगी बस, पर्यटन वाहने आणि मालवाहतूक वाहनांनाही फटका बसला. वाहतूक सुरळीत करण्यासाठी पोलिसांनी प्रयत्न सुरू केले आहेत. मात्र वाहनांची संख्या खूप जास्त असल्याने परिस्थिती नियंत्रणात आणण्यासाठी वेळ लागत आहे.