कोल्हापूर महापालिकेचा प्रवेश कर वसुलीचा संभाव्य निर्णय ‘तुघलकी’; भ्रष्टाचारासाठी जनतेच्या खिशावर दरोडा, राजू शेट्टी यांची टीका

महापालिकेत सध्या विकासकामांची अंदाजपत्रके जाणीवपूर्वक फुगवून त्यातून स्वतःची टक्केवारी काढायची आणि दुसरीकडे शहराच्या विकासाचे नाव पुढे करून सर्वसामान्य जनतेच्या माथी टोल मारायचा, ही अत्यंत घाणेरडी व चुकीची पद्धत सुरू आहे. कोल्हापूर महापालिकेच्या भ्रष्ट कारभाऱ्यांनी आजवर महापालिका दोन्ही हातांनी लुटली आहे. आता या कारभाऱ्यांना त्यांच्या टक्केवारी आणि भ्रष्टाचारासाठी पैसा कमी पडू लागल्यानेच, त्यांनी हा कर आकारणीचा घाट घातला आहे, असा घणाघाती आरोप राजू शेट्टी यांनी केला आहे.

ग्रामीण जनतेमध्ये संताप

महापालिकेने केवळ ‘ एम एच ९ (कोल्हापूर) पासिंग वगळता इतर सर्व वाहनांवर कर लावण्याचा घाट घातला आहे. परंतु, कोल्हापूर जिल्ह्यातीलच नवीन पुनर्रचित इचलकरंजी, हातकणंगले आणि शिरोळ या तालुक्यांतील वाहनांचे पासिंग ‘ एम एच ५१’ आहे. हे लोक रोज विविध कामांसाठी, बाजारपेठेसाठी आणि उपचारांसाठी कोल्हापूर शहरात येतात. जिल्ह्याचेच नागरिक असलेल्या या वाहनधारकांवर आणि इतर कोणत्याही वाहनावर अशा प्रकारे अन्यायकारक टोल लादणे अत्यंत अन्यायकारक आहे. या निर्णयामुळे ग्रामीण भागातील जनतेमध्ये प्रचंड तीव्र प्रतिक्रिया उमटत असून, जनक्षोभ उसळला आहे.

आक्रमक आंदोलन उभारणार

स्वाभिमानी शेतकरी संघटना या जनविरोधी निर्णयाला पूर्ण ताकदीने विरोध करत आहे. कोल्हापूर शहरात येणाऱ्या केवळ एम एच ०९/५१ च नव्हे, तर कोणत्याही वाहनाला टोल किंवा प्रवेश कर आकारू नये, ही आमची ठाम मागणी आहे. महापालिका प्रशासनाने हा निर्णय तातडीने मागे न घेतल्यास, इचलकरंजी, हातकणंगले, शिरोळसह संपूर्ण कोल्हापूर जिल्ह्यातून महापालिकेच्या विरोधात आक्रमक आंदोलन छेडण्यात येईल. यामुळे निर्माण होणाऱ्या कायदा व सुव्यवस्थेच्या परिस्थितीला पूर्णपणे महापालिका प्रशासन आणि येथील भ्रष्ट कारभारीच जबाबदार असतील, असे राजू शेट्टी यांनी म्हटले आहे.