गुंडगिरी फोफावली असताना पोलीसांकडून केवळ हप्ते वसुली – आ. खोत यांचा गंभीर आरोप

आ. खोत यांनी शाळकरी मुलगा वेदांत बंडगर याचा खून झाल्यानंतर कुटुंबियांची आज भेट घेतली. यानंतर माध्यम प्रतिनिधींशी बोलताना ते म्हणाले, सांगली मधील वेदांत बंडगर याचा जीव वाचला असता पण जतचे पोलिस निरीक्षक संदीप कोळेकर यांनी कामात बेफिकीरपणा दाखवला, गांभीर्य दाखवले नाही. खंडणी मागून धमकी देणारे गुंड फिरत असताना हे पोलिस निरीक्षक हसत होते. त्यामुळे गांभीर्य नसलेल्या पोलिस निरीक्षकाला तातडीने निलंबित करा अशी मागणी राज्याचे मुख्यमंत्री फडणवीस यांच्याकडे निवेदनाद्वारे करणार आहे. जतच्या पोलिस निरीक्षकांना कोणाकोणाचे फोन आले होते. त्यासंदर्भात चौकशी होणे गरजेचे आहे.

सांगली जिल्ह्यात यापूर्वी गुंडागर्दी फोफावली होती. पण काही अधिकाऱ्यांनी त्याला लगाम घातला होता. अलीकडच्या काळात सांगली जिल्ह्यात सर्वसामान्य जनतेला जगणं असह्य झाले आहे. गुंडागर्दीचा धुमाकूळ गावापासून तालुक्यापर्यंत सुरु आहे. त्याला लगाम घालणारे कोण नाही. सांगली जिल्ह्यातले पोलिस निरीक्षक, सहाय्यक निरीक्षक, उपअधिक्क्षक यांची बदली करणे गरजेचे आहे. सगळे गुन्हेगारांना मिलीभगत झालेले लोक आहेत. त्याचमुळे अंमली पदार्थ गुन्हेगारांचे आश्रयस्थान पोलिस ठाणे झाल्याची वाईट परिस्थिती झाली आहे. सगळी पोलिस ठाणी स्वच्छ करण्याची गरज आहे. मटका, गुटखा हप्ते घेऊन सुरु आहेत. आम्हाला जनतेचे काही देणेघेणे नाही फक्त हप्ते पाहिजे अशी त्यांची भूमिका असून वसुलीसाठी पंटर नेमले आहेत.

या जिल्ह्यातील उपअधीक्षकांची कारकीर्द पहिली कि ते फक्त वसुलीचे पैसे घेत बसतात असा गंभीर आरोप करत याबाबत मंगळवारी मुख्यमंत्र्यांना भेटून सगळे मोडीत काढणारे अधिकारी द्या अशी मागणी करणार असल्याचे ते म्हणाले.