सांगली जिल्हा बँकेच्या नोकरभरतीची स्थगिती न्यायालयाने उठवली

जिल्हा बँकेत ४४४ कनिष्ठ लिपिक पदासाठी दि.२४ जूनपासून भरती प्रक्रिया सुरू केली होती. सरकारने सुचविलेल्या आयबीपीएस कंपनीमार्फत ही भरती प्रक्रिया केली जाणार असून उमेदवारांनी दि. ८ जुलै अखेर उमेदवारी अर्ज दाखल करण्याची मुदत देण्यात आली होती. नोकरभरतीसाठी बँकेने जाहीरातही प्रसिध्द केली आहे.

विद्यमान संचालक मंडळाची मुदत २२ नोव्हेंबर रोजी समाप्त होत असून निवडणुकीची पूर्व तयारी सहकार विभागाकडून सुरू असल्याने  नोकरभरती स्थगित करण्यात यावी अशी मागणी आ. खाडे व आ. खोत यांनी केली होती. तसेच भरती प्रक्रियेसाठी लेखी परीक्षेला ९० गुण आणि १० गूण मुलाखतीसाठी संचालक मंडळाच्या अधिकारात यावरही आक्षेप घेण्यात आला होता. या आक्षेपाची दखल घेत सहकार विभागाने नवीन संचालक मंडळ स्थापन होईपर्यंत नोकरभरतीस स्थगिती देण्यात येत असल्याचे आदेश गुरूवार दि.२ जुलै रोजी दिले होते.

नोकरभरतीस स्थगिती देण्याच्या शासनाच्या आदेशाला बँक व्यवस्थापनाकडून मुंबई उच्च न्यायालयाच्या कोल्हापूर सर्किट बेंचसमोर आव्हान देणारी याचिका दाखल करण्यात आली होती. या याचिकेवर आज सुनावणी होउन न्यायालयाने शासनाने दिलेली स्थगिती उठवली असून नोकरभरतीची प्रक्रिया थांबवता येणार नाही असे आदेश दिले आहेत. तसेच याबाबत येत्या १५ दिवसात म्हणणे मांडण्याचे आदेश शासनाला दिले आहेत.
दरम्यान, शासनाचा स्थगिती आदेश येईपर्यंत ४४४ जागासाठी भरती ऑनलाईन अर्ज दाखल करण्यात येत होतेे. या कालावधीत १४ हजार १५७ उमेदवारांनी नोकरीसाठी अर्ज दाखल केले आहेत.

नोकरीसाठी इच्छुक असलेल्यामध्ये संभ्रम निर्माण झाला असला तरी निर्धारित कार्यक्रमानुसार भरती प्रक्रिया पुढे सुरू ठेवण्यात येत असून उमेदवारी अर्ज दाखल करण्यासाठी दोन दिवसांची म्हणजे दि.१० जुलै पर्यंत मुदतवाढ देण्यात येत असल्याचे अध्यक्ष मानसिंगराव नाईक यांनी सांगितले.