सांगली : सांगली आणि मिरज शहरात रविवारी सायंकाळी वीजांच्या कडकडाटासह जोरदार मान्सूनपूर्व पावसाने हजेरी लावली. दिवसभर उष्णता आणि वाढलेल्या आर्द्रतेमुळे हैराण झालेल्या नागरिकांना या पावसामुळे मोठा दिलासा मिळाला. मात्र, अचानक कोसळलेल्या पावसामुळे वाहनधारक, पादचारी तसेच रस्त्यावरील विक्रेत्यांची चांगलीच तारांबळ उडाली.
सायंकाळच्या सुमारास काळ्या ढगांनी आकाश व्यापल्यानंतर वादळी वाऱ्यासह पावसाला सुरुवात झाली. काही भागांत वीजांच्या कडकडाटामुळे नागरिकांनी सुरक्षित ठिकाणी आश्रय घेतला. पावसाचा जोर वाढताच शहरातील प्रमुख रस्त्यांवर पाणी साचण्यास सुरुवात झाली.
सांगलीतील व्यापारी पेठ म्हणून ओळखल्या जाणाऱ्या मारुती रोड परिसरात पावसाचे पाणी मोठ्या प्रमाणात साचले. पाण्याचा निचरा वेळेवर न झाल्याने या भागाला अक्षरशः तलावाचे स्वरूप प्राप्त झाले होते. त्यामुळे वाहनचालकांना वाहने चालविताना मोठी कसरत करावी लागली. अनेक दुचाकीस्वारांनी दुकानांच्या आडोशाला थांबून पावसाचा जोर ओसरण्याची वाट पाहिली.
मिरज शहरातही जोरदार पावसाचा प्रभाव दिसून आला. तांदूळ मार्केट परिसरात रस्त्यांवर पाणी साचल्याने वाहतुकीचा वेग मंदावला. फिरते विक्रेते आणि पदपथावरील व्यवसायिकांना आपला माल सुरक्षित ठेवण्यासाठी धावपळ करावी लागली. अचानक आलेल्या पावसामुळे बाजारपेठेतील ग्राहकांनाही आसरा शोधावा लागला.
दरम्यान, या पावसामुळे शहरातील वातावरणात गारवा निर्माण झाला असून उष्णतेपासून काहीसा दिलासा मिळाला आहे. दुसरीकडे ग्रामीण भागातील शेतकऱ्यांनी या पावसाचे स्वागत केले आहे. खरीप हंगामाच्या तोंडावर झालेला हा पाऊस पेरणीपूर्व मशागतीसाठी उपयुक्त ठरणार असून जमिनीत ओलावा निर्माण होण्यास मदत होणार आहे. त्यामुळे आगामी पेरणीच्या तयारीला वेग येण्याची अपेक्षा व्यक्त केली जात आहे.
हवामान खात्याच्या अंदाजानुसार पुढील काही दिवस ढगाळ वातावरणासह अधूनमधून पावसाच्या सरी कोसळण्याची शक्यता असून नागरिकांनी वीजांच्या कडकडाटाच्या वेळी आवश्यक खबरदारी घेण्याचे आवाहन करण्यात आले आहे.
