पश्चिम घाटातील संततधार पावसामुळे वारणा नदी पात्राबाहेर, कृष्णेवरील चार बंधारे पाण्याखाली

गेल्या २४ तासात शिराळा तालुक्यात दमदार पाउस कोसळत असून सांगली, मिरज शहरात थांबून थांबून पावसाच्या सरी कोसळत असल्या तरी पावसाचा जोर ओसरला आहे. वारणा नदी पात्राबाहेर पडली असून आजूबाजूच्या मळीत पाणी शिरले आहे. यामुळे नदीकाठच्या शेतातील शेकडो एकर क्षेत्रातील पिके  पाण्याखाली गेली आहेत. मांगले-सावर्डे पूल व मांगले-बच्चे सावर्डे बंधारा पाण्याखाली गेला आहे. गेल्या दोन दिवसापासून यावरील वाहतूक थांबविण्यात आली आहे. तसेच कोकरूड ते रेठरे या मार्गावरील बंधारा पाण्याखाली गेला आहे.  वारणा नदीला पूर आला असून  पूराचे पाणी मळीच्या शेतात  विस्तारल्याने वारणा काठ धास्तावला आहे.

गेल्या २४ तासात चांदोली धरणाच्या पाणलोट क्षेत्रात ९९ मिलीमीटर पावसाची नोंद झाली असून तालुक्यात सरासरी  ६१.२ मिलीमीटर पाउस झाला. तालुक्यातील कोकरूड मंडळात ८२ तर चरण मंडळात ११०.३ मिलीमीटर पाउस झाला असून ओढे, नाले भरून वाहत आहेत. रानात पाणी साचले असल्याने लांबलेल्या ल्या भात पेरण्या रखडल्या आहेत.  

कृष्णा नदीच्या पाणलोट क्षेत्रात पश्‍चिम घाट परिसरात मुसळधार पाउस पडत असल्याने कृष्णा नदीच्या पाणी पातळीतही सातत्याने वाढ होत आहे. सोमवारी सकाळी सांगलीतील आयर्विन पूलाजवळ पाणी पातळी साडेबारा फूटावर पोहचली आहे. कृष्णा नदीवरील बहे (ता. वाळवा), सांगली, म्हैसाळ (ता. मिरज) व राजापूर (ता. शिरोळ) हे चार बंधारे पाण्याखाली गेल्याचे जलसंपदा विभागाकडून सांगण्यात आले.

चांदोली धरणाच्या पाणलोट क्षेत्रात संततधार पाउस पडत असल्याने धरणात प्रतिसेकंद दहा हजार कयूसेकची आवक आहे. सोमवारी सकाळी धरणात १४.५९ टीएमसी पाणीसाठा झाला असून साठवण क्षमता ३४.४० टीएमसी आहे. तर कोयना धरणात २७.६७ टीएमसी पाणीसाठा झाला आहे. कोयना धरणाच्या पाणलोट क्षेत्रात कोयना येथे २५७, महाबळेश्‍वर येथे ४७३ तर नवजा येथे २४४ मिलीमीटर पाउस नोंदला गेल्याचे पूरनियंत्रण कक्षातून सांगण्यात आले.

जिल्ह्यात गेल्या २४ तासात सरासरी १४.६ मि. मी. पावसाची नोंद झाली असून शिराळा तालुक्यात सर्वाधिक ६१.२ मि. मी. पावसाची नोंद झाली आहे. पावसाची तालुकानिहाय आकडेवारी मि. मी. मध्ये पुढीलप्रमाणे. मिरज ८.६, जत १.२, खानापूर ६.१, वाळवा १९.२, तासगाव १२, शिराळा ६१.२, आटपाडी १.५, कवठेमहांकाळ ८.८, पलूस १० आणि कडेगाव १५.७.