सातारा जिल्हा रुग्णालयाच्या शिपायास लाच घेताना अटक

या कारवाईमुळे सातारा जिल्हा रुग्णालयात जिल्ह्यातील वैद्यकीय क्षेत्रात एकच खळबळ उडाली. तक्रारदार यांचे भागीदारीमध्ये रुग्णालय असून, त्यामध्ये सोनोग्राफी सेंटर, सरकारमान्य गर्भपात केंद्र, कुटुंब नियोजन केंद्र सुविधा सुरू करण्यासाठी त्यांनी जिल्हा शल्यचिकित्सक सातारा यांच्याकडे प्रस्ताव दाखल केला होता. त्याच्या मंजुरीसाठी ते तत्कालीन जिल्हा शल्यचिकित्सकाच्या दालनातील शिपाई आनंदा वाळवेकर यांना वारंवार भेटले होते. वाळवेकर यांनी जिल्हा शल्यचिकित्सक डॉ युवराज करपे यांच्यासाठी ५० हजार रुपये लाच मागण्यात आल्याची तक्रार तक्रारदाराने ९ मार्च रोजी लाचलुचपत प्रतिबंधक विभागाचे उपअधीक्षक राजेश वाघमारे यांच्याकडे दाखल झाली होती.

या तक्रारीच्या संदर्भाने ९ मार्चपासून १५ एप्रिलपर्यंत सात टप्प्यांमध्ये लाचलुचपत प्रतिबंधक विभागाच्या पथकाने या प्रकरणाची कसून पडताळणी केली. १७ एप्रिल रोजी निर्णायक पडताळणीमध्ये जिल्हा शल्यचिकित्सकांचे शिपाई आनंदा वाळवेकर यांनी डॉ.करपे यांच्याकरिता तक्रारदारांकडून पंचांसमक्ष ५० हजार रुपये लाच घेतली. त्यानंतर तत्काळ सापळा पथकाने त्यांना अटक केली.

या कारवाईमुळे सातारा जिल्हा रुग्णालयाच्या आरोग्य वर्तुळात एकच खळबळ उडाली आहे. करपे यांच्यावर यापूर्वीच आरोग्य उपसंचालकांची निलंबनाची कारवाई झाली आहे. त्यांची सेवा कोल्हापूर उपसंचालकांकडे वर्ग करण्यात आली आहे. सध्या त्यांची चौकशी सुरू आहे. त्यातच लाचखोरीच्या प्रकरणांमध्ये त्यांचे नाव आल्याने डॉ युवराज करपे यांच्या अडचणी वाढल्या आहेत. वाळवेकर याच्यावर भ्रष्टाचार प्रतिबंधक कायद्यानुसार सातारा शहर पोलीस ठाण्यात गुन्हा नोंद करण्यात आला आहे.