साताऱ्यात ‘गुलमोहर दिन’ उत्साहात; निसर्ग, कला आणि पर्यावरणप्रेमाचा अनोखा संगम

मे महिन्याच्या सुरुवातीला बहरणाऱ्या गुलमोहराच्या लालचुटूक फुलांनी सजलेल्या रस्त्यांमध्ये नागरिकांनी या दिवसाचे स्वागत केले. निसर्गप्रेमी, कलाकार, छायाचित्रकार आणि स्थानिक नागरिक मोठ्या संख्येने एकत्र येत गुलमोहराच्या सौंदर्याचा आनंद घेताना दिसले.

या निमित्ताने विविध सांस्कृतिक आणि कलात्मक उपक्रमांचे आयोजन करण्यात आले. कविता वाचन, निसर्ग छायाचित्रण स्पर्धा, चित्रकला प्रदर्शन अशा कार्यक्रमांमुळे वातावरण अधिक रंगतदार झाले. विशेषतः तरुणाईने मोठ्या उत्साहाने सहभाग नोंदवत या उपक्रमांना प्रतिसाद दिला. ‘गुलमोहर दिन’ केवळ सौंदर्याचा उत्सव नसून, पर्यावरण जनजागृतीचा संदेश देणारा उपक्रम ठरतो. शहरातील वृक्षसंवर्धन, पर्यावरणाचे महत्त्व आणि निसर्गाशी नाते जपण्याची गरज याकडे नागरिकांचे लक्ष वेधण्यात या दिवसाची मोठी भूमिका आहे.

साताऱ्याचा ‘गुलमोहर दिन’ हा महाराष्ट्र दिनासोबत साजरा होणारा एक अनोखा आणि प्रेरणादायी उत्सव ठरला असून, निसर्ग आणि संस्कृती यांचा सुंदर संगम अनुभवण्यासाठी नागरिक दरवर्षी मोठ्या उत्साहाने सहभागी होत आहेत. उन्हाळ्यात बहरणारी फुले या विषयावर विविध कार्यक्रमांचे आयोजन केल जाते. काही हौशी निसर्गप्रेमी गाणी आणि कविता सादर करतात. जिल्ह्यातील त्याच बरोबर जिल्ह्याबाहेरील हौशी कलाकार या गुलमोहर दिनानिमित्त वेगवेगळ्या कला या ठिकाणी सादर करतात. या कार्यक्रमाला लहान, मोठे सर्व एका ठिकाणी जमून गुलमोहर झाडाची, वेगवेगळ्या फुलांची चित्रे काढतात. साताऱ्यात होत असलेल्या गुलमोहर दिनानिमित्त या कार्यक्रमाचे स्वरूप दिवसेंदिवस वाढत असल्याचे पाहायला मिळत आहे.

सातारा शहरातील अमेरिकन चर्च परिसरामध्ये हौशी कलाकार कवी कवयित्री चित्रकर्मी यांचा मोठा मेळावा भरला होता. महाराष्ट्र दिनाचे औचित्य धरून विविध कार्यक्रम साजरे होत असताना साताऱ्यात मात्र रंगांचा वेगळा महोत्सव या निमित्ताने पाहायला मिळाला. या गुलमोहर महोत्सवात गुलमोहराच्या भावना व्यक्त करणाऱ्या अनेक कविता सादर झाल्या. तसेच गुलमोहराच्या रंगछटा, वेगवेगळी चित्रे प्रदर्शित झाली. चर्च परिसरातील अनेक गुलमोहर तसेच इतर झाडांच्या फांद्यांवर वेगवेगळ्या भावविश्वाची रंगीबेरंगी छायाचित्रे लटकवण्यात आली होती. तसेच म्युरल्स बनवणाऱ्या काही कलाकारांनी या मेळाव्यात भाग घेतला होता.
.