सातारा : सातारा जिल्हा मध्यवर्ती सहकारी बँकेचे संचालक आणि ग्रामविकास मंत्री जयकुमार गोरे यांचे बंधू शेखर गोरे यांनी १ सप्टेंबर रोजी शिंदेंच्या शिवसेनेत प्रवेश करण्याचा निर्णय घेतला आहे. मुंबईत उपमुख्यमंत्री एकनाथ शिंदे यांच्या उपस्थितीत हा पक्षप्रवेश पार पडणार असून, यामुळे भाजपसह माण-खटाव तालुक्यातील राजकारण बदलण्याची चिन्हे आहेत.
मागील विधानसभा निवडणुकीत जयकुमार गोरे यांच्या विजयात शेखर यांनी अत्यंत महत्त्वाची भूमिका बजावली होती. मात्र, विधान परिषद निवडणुकीच्या पार्श्वभूमीवर दिलेल्या आश्वासनाची पूर्तता न झाल्याने ते गेल्या काही दिवसांपासून भाजपवर नाराज होते. या नाराजीतूनच त्यांनी अखेर ‘धनुष्यबाण’ हाती घेण्याचा निर्णय घेतला आहे.
एकेकाळी भावाला विधानसभेत पोहोचवण्यासाठी जीवाची बाजी लावणारे शेखर आता विरोधी छावणीत दाखल होत असल्याने जयकुमार गोरेंसाठी हा मोठा राजकीय धक्का मानला जात आहे. शेखर गोरेंंच्या या निर्णयामुळे माण आणि खटाव तालुक्यात शिवसेनेची (शिंदे गट) संघटनात्मक ताकद मोठ्या प्रमाणावर वाढणार आहे.
आगामी स्थानिक स्वराज्य संस्थांच्या निवडणुकांच्या तोंडावर झालेल्या या बंडखोरीमुळे सातारा जिल्ह्यातील प्रस्थापित राजकारणाची गणिते पार बदलून गेली आहेत. कालपर्यंत खांद्याला खांदा लावून लढणारे दोन भाऊ आता आमनेसामने ठाकणार असल्याने माण-खटावच्या राजकारणात नेमकी कोणती नवी समीकरणे आकाराला येतात, याकडे संपूर्ण जिल्ह्याचे लक्ष लागले आहे.
जिल्हा बँकेच्या सहकार पटावर नवा डाव; सत्तासमीकरणे बदलणार
या पक्षप्रवेशामुळे सातारा जिल्हा मध्यवर्ती सहकारी बँकेच्या आगामी निवडणुकीतील राजकीय हालचालींना प्रचंड वेग आला आहे. सहकार क्षेत्रावर वर्चस्व मिळवण्यासाठी विविध गटांकडून मोर्चेबांधणी सुरू असताना, माण-खटाव पट्ट्यात दांडगा प्रभाव असणारे शेखर गोरे यांची ही खेळी अत्यंत निर्णायक ठरणार आहे.
विधान परिषदेत राजकीय संधी न मिळाल्याच्या नाराजीतून सुरू झालेल्या या घडामोडींमुळे त्यांच्या पुढील भूमिकेबाबतच्या चर्चांना पूर्णविराम मिळाला असला, तरी खरा केंद्रबिंदू जिल्हा बँकेची निवडणूकच ठरणार आहे. सहकारातील पारंपरिक समीकरणांना धक्का देणारा हा प्रवेश जयकुमार गोरे यांच्या राजकीय गोटासाठी मोठे आव्हान मानले जात आहे. जिल्हा बँकेची निवडणूक ही केवळ संचालक निवडण्याची प्रक्रिया नसून सहकारातील सत्ता ठरवणारी लढाई असल्याने, १ सप्टेंबरच्या या प्रवेशानंतर जिल्ह्यात कोणत्या नव्या आघाड्या आकाराला येतात याकडे सर्वांचे लक्ष लागले आहे.
