राजकीय कुरघोड्या थांबवा अन् विकासाला लागा; शिवेंद्रसिंहराजेंचा नगरसेवकांना इशारा

सातारा शहरातील नगरसेवकांची महत्त्वपूर्ण बैठक छत्रपती शिवाजी सभागृहात पार पडली. या बैठकीला मंत्री शिवेंद्रसिंहराजे भोसले यांनी मार्गदर्शन केले. यावेळी नगराध्यक्ष अमोल मोहिते आणि उपनगराध्यक्ष ॲड दत्ता बनकर उपस्थित होते.

शिवेंद्रसिंहराजे म्हणाले की, पूर्वी राजकीय आघाड्या आणि मतभेद होते, हे मान्य आहे. मात्र आता सर्वजण एकाच पक्षातून निवडून आले आहेत. त्यामुळे एकमेकांवर टीका-टिप्पणी करण्याऐवजी एकत्र काम करण्याची गरज आहे. यावेळी त्यांनी उदयनराजे भोसले यांचाही उल्लेख करत, दोघेही एकाच पक्षातून निवडून आल्यामुळे समन्वय अधिक महत्त्वाचा असल्याचे सांगितले. नगरसेवकांनी आपापल्या प्रभागातील प्रश्न सोडवताना नगराध्यक्ष, उपनगराध्यक्ष आणि सभापतींना विश्वासात घ्यावे. समन्वयातून कामे मार्गी लावावीत. वैयक्तिक राजकारण टाळावे, असे स्पष्ट निर्देश त्यांनी दिले.

सोनगाव डेपो आगीवर संताप
सोनगाव कचरा डेपोतील आगीच्या घटनेवर तीव्र नाराजी व्यक्त करत त्यांनी प्रशासनाच्या हलगर्जीपणावर बोट ठेवले. वेळेत माहिती दिली असती तर आग नियंत्रणात आली असती. संबंधित आरोग्य निरीक्षक व ठेकेदारावर कारवाई करण्यात आली आहे. भविष्यात अशा घटना टाळण्यासाठी कायमस्वरूपी उपाययोजना करण्याच्या सूचना शिवेंद्रसिंहराजे यांनी दिल्या.

कस्तुरबा रुग्णालयाच्या इमारतीवरून सुरू असलेल्या वादावर बोलताना मंत्री शिवेंद्रसिंहराजे भोसले म्हणाले, इमारतीत अवैध प्रकार वाढले होते. त्यामुळे ती पाडण्याचा निर्णय आधीच घेतला होता. त्या जागेवर राजवाडा परिसरातील हातगाडीधारकांचे पुनर्वसन केले जाणार आहे. यामुळे शहरातील वाहतूक व अतिक्रमणाचा प्रश्नही सुटण्यास मदत होणार आहे.