कोल्हापूर जिल्ह्यात ऊस दर आंदोलनास हिंसक वळण

शेतकऱ्यांना रास्त,परवडणारा ऊस दर मिळावा यासाठी झटणारे, ‘ आंदोलन अंकुश’ संघटनेचे प्रमुख धनाजी चुडमुंगे यांना काल रात्री शिरोळ येथे मारहाण करण्यात आली. साखर कारखान्याने जाहिर केलेला प्रतिटन ३४०० रूपये दर परवडत नाही. कारखान्याने एफआरपी एवढाच दर दिलेला आहे. साखर व उपपदार्थांना चांगले दर मिळून देखील शेतकऱ्यांना किमान आधारभूत किंमतच कारखाना देत आहे, पण नफ्यातील एक रुपयाही देत नाहीत याच्या विरोधात चुडमुंगे यांनी शिरोळ व परिसरातील शेतकऱ्यांना ऊस तोडी न घेण्याचे आवाहन केलेले होते. त्याचबरोबर ज्या तूरळक शेतकऱ्यांनी ऊस तोडी घेतल्या आहेत त्या ऊस तोडी रोखण्याचे काम चालू होते.
 
काल रात्री शिरोळच्या छत्रपती शिवाजी महाराज चौकात दत्त कारखान्याकडे जाणारी वाहने धनाजी चुडमुंगे यांनी रोखण्याचा प्रयत्न केला. यावेळी कारखाना समर्थकांनी त्यांना मारहाण केली. तसेच उसाच्या ट्रॅक्टर समोरून फरफटत बाजूला केले. त्याच्या निषेधार्थ शिरोळमधील छत्रपती शिवाजी महाराज चौकात शेकडो शेतकरी जमले.

धनाजी चुडमुंगे यांना कारखाना समर्थकांनी काल रात्री मारहाण केल्याच्या निषेधार्थ आज शिरोळ गाव बंद पुकारण्यात आला आहे. या बंदला चांगला प्रतिसाद मिळाला असून गावातील व्यवहार बंद करण्यात आले आहेत. दरम्यान समाज माध्यमात चुडमुंगे यांना पाठबळ दिले जात आहे. धनाजी चुडमुंगे आंदोलन अंकुशचे संस्थापक नेते आहेत. भ्रष्टाचाराच्या विरोधात विविध आंदोलनात ते सहभागी असतात. ऊस चळवळीतील अग्रणीय चेहरा म्हणून ते ओळखले जातात.