अॅक्युरेट एसेस संघाने लागोपाठ दुसरा विजय नोंदवत प्रीमियर टेनिस लीगमध्ये बाद फेरीच्या दिशेने वाटचाल कायम राखली. त्यांनी शार्प स्मॅशर्स संघावर २६-२१ अशी मात केली. डेक्कन जिमखाना क्लब येथे सुरू असलेल्या या स्पर्धेत बेसलाइन बॉम्बर्स संघानेही अपराजित्व कायम राखले. साखळी गटात त्यांनी डॅझलिंग डय़ुसेस संघाचा २६-२० असा पराभव केला. अॅक्युरेट संघाच्या रिशिका सुंकारा हिने एकेरीत सौजन्या बाविशेट्टी हिला ६-२ असे हरविले. पाठोपाठ तिचा सहकारी तेजस चौकुलकर याने आकाश वाघ याचा ६-५ (७-१) असा चिवट लढतीनंतर पराभव केला. श्रीराम बालाजी याने अॅक्युरेट संघाचे वर्चस्व राखताना सनमसिंग याला ६-५ (७-३) असे पराभूत केले. विष्णू वर्धन याने इती मेहता हिच्या साथीत मिश्रदुहेरीत पी. विघ्नेश व शामिनी बालू यांच्यावर ६-३ अशी मात केली. शेवटच्या पुरुष दुहेरीत मात्र अॅक्युरेट संघाच्या बालाजी व अरुण प्रकाश यांना विजयंत मलिक व सनमसिंग यांच्याकडून २-६ असा पराभव स्वीकारावा लागला.बेसलाइन संघाच्या रश्मी तेलतुंबडे हिला एकेरीच्या पहिल्या लढतीत अंकिता रैना हिच्याकडून २-६ असा पराभव स्वीकारावा लागला. मात्र तिचा सहकारी विजयसुंदर प्रशांत याने ख्रिस्तोफर मार्क्स याचा ६-३ असा पराभव केला. त्यानंतर बेसलाइन संघाचा स्टार खेळाडू साकेत मायनेनी याने जीवन नेंदुन्चेळियन याच्यावर ६-२ अशी मात केली. पाठोपाठ त्यांच्या केदार शहा व प्रार्थना ठोंबरे यांनी मोहित मयूर व श्वेता राणा यांना ६-५ (७-५) असे संघर्षपूर्ण लढतीनंतर पराभूत केले. मायनेनी याने रूपेश रॉय याच्या साथीत दुहेरीत जीवन नेंदुन्चेळियन व काझा शर्मा यांना ६-४ असे हरविले.
