भारतीय संघाचा युवा स्टार खेळाडू अजिंक्य रहाणेने शुक्रवारी लग्नाच्या बेडीत अडकून नव्या इनिंगला सुरूवात केली आहे. संयमी आणि शैलीदार फलंदाजीने सर्वांचे लक्ष वेधून घेणाऱया अजिंक्यचे मन मुंबईच्या राधिकाने जिंकले. अजिंक्य राधिकासोबत पारंपारिक पद्धतीने विवाहबद्ध झाला. हे दोघेही मुंबईतील मुलुंड येथे राहतात आणि विशेष म्हणजे, अजिंक्य आणि राधिकाचं हे अरेंज मॅरेज आहे.
रहाणेने भारतासाठी आतापर्यंत १० कसोटी आणि ३४ एकदिवसीय सामने खेळले आहेत. नुकत्याच झालेल्या इंग्लंडदौऱयात विराट कोहली, चेतेश्वर पुजारा आणि मुरली विजय इंग्लंड गोलंदाजांसमोर सपशेल शरणागती पत्करत होते तेव्हा रहाणेने भारताची बाजू सांभाळत दमदार कामगिरी करत इंग्लंडची गोलंदाजी भेदून काढली होती. लॉर्डवरील ऐतिहासिक वारसा असलेल्या खेळपट्टीवर रहाणेने शानदार शतक ठोकून भारताच्या विजयात महत्त्वाची कामगिरी बजावली होती.