आशियाई विजेत्या अमित पांघलने (५२ किलो) चायनीज तैपेईच्या टू पो-वेई याचा सहज धुव्वा उडवत जागतिक बॉक्सिंग अजिंक्यपद स्पर्धेच्या पदकाच्या दिशेने कूच केली आहे. मनीष कौशिक (६३ किलो) यानेही आपली लढत सहज जिंकत आगेकूच केली. दुसऱ्या मानांकित २३ वर्षीय अमितने प्रतिस्पर्ध्याचा ५-० असा पराभव करत उपउपांत्यपूर्व फेरीत आपले स्थान निश्चित केले आहे. त्याला पहिल्या फेरीत पुढे चाल मिळाली होती. मनीषने नेदरलँड्सच्या एन्रिको लॅकरूझ याच्यावर ५-० अशी निर्विवाद हुकूमत गाजवली. अमितने आपल्या धारदार ठोशांनी पो-वेईवर वर्चस्व गाजवले. अमितने आक्रमक खेळ करून पो-वेईला पूर्णपणे नामोहरम केले. आता उपउपांत्यपूर्व फेरीच्या सामन्यात अमितला तुर्कीच्या बाटूहान सिफ्टसी याच्याशी लढत द्यावी लागेल.
