News Flash

Ashes 2019 : तब्बल १८ वर्षांनी जुळून आला ‘हा’ योगायोग

ऑस्ट्रेलियाकडून इंग्लंडचा १८५ धावांनी पराभव

अ‍ॅशेस कसोटी क्रिकेट मालिकेत ऑस्ट्रेलियाने चौथ्या सामन्यात इंग्लंडला १८५ धावांनी धूळ चारली. जागतिक कसोटी गोलंदाजांच्या क्रमवारीत अग्रस्थानी विराजमान असलेल्या पॅट कमिन्सने रविवारी लौकिकाला साजेशी कामगिरी करत संघाला विजय मिळवून दिला. या विजयासह ऑस्ट्रेलियाने प्रतिष्ठेचा अ‍ॅशेस करंडक त्यांच्याकडेच राखून पाच सामन्यांच्या मालिकेत २-१ अशी आघाडी घेतली. २०१७ च्या अ‍ॅशेस मालिकेत ऑस्ट्रेलियाने ४-० असे यश मिळवले होते.

ऑस्ट्रेलियाने टीम पेनच्या नेतृत्वाखाली हा सामना जिंकला आणि मालिकेत आघाडी घेतली. या विजयामुळे तब्बल १८ वर्षांनी ऑस्ट्रेलियासाठी एक सुखद योगायोग जुळून आला. २००१ साली स्टीव्ह वॉ च्या नेतृत्वाखाली ऑस्ट्रेलियाच्या संघाने इंग्लंडमधून अ‍ॅशेस ट्रॉफी स्वत:कडे आणण्यात यश मिळवले होते. त्याचप्रकारे टीम पेन ने यंदा इंग्लंडमध्ये स्पर्धा सुरू असताना ट्रॉफी आपल्याकडे राखण्यात यश मिळवले आहे.

दरम्यान, ऑस्ट्रेलियाने दिलेल्या ३८३ धावांच्या लक्ष्याचा पाठलाग करताना इंग्लंडचा दुसरा डाव १९७ धावांत आटोपला. शनिवारच्या २ बाद १८ धावांवरून पुढे खेळताना इंग्लंडच्या जेसन रॉय आणि जो डेन्ली यांनी सावध सुरुवात केली. दोघांनी तिसऱ्या गडय़ासाठी ६६ धावांची भागीदारी रचली; परंतु कमिन्सचे दुसऱ्या स्पेलमध्ये आगमन होताच इंग्लंडचा डाव कोसळला.

कमिन्सने सलग दुसऱ्या डावात रॉयचा बॅट आणि पॅडमधून (३१) त्रिफळा उडवला, तर पाच षटकांच्या अंतरातच त्याने धोकादायक बेन स्टोक्सला अवघ्या एका धावेवर बाद करून इंग्लंडला अडचणीत टाकले. डेन्लीने अर्धशतक झळकावून इंग्लंडला सावरण्याचा प्रयत्न केला, परंतु नॅथन लायनने त्याला ५३ धावांवर बाद करून ऑस्ट्रेलियाचा मार्ग अधिक सोपा केला. ५ बाद ९३ धावांवरून जॉनी बेअरस्टो आणि जोस बटलर यांनी सहाव्या गडय़ासाठी महत्त्वपूर्ण ४५ धावा जोडल्या. मात्र मिचेल स्टार्कने बेअरस्टोला (२५) पायचीत पकडून इंग्लंडला सहावा धक्का दिला.

अखेरच्या सत्रात इंग्लंडला ३६ षटके फलंदाजी करणे आवश्यक होते. जोस बटलर आणि क्रेग ओव्हरटर्न यांनी सातव्या गडय़ासाठी महत्त्वपूर्ण ३४ धावांची भर घालतानाच १० षटके खेळून काढल्यामुळे यजमान सामना वाचवण्यात अपयशी ठरणार, असे वाटू लागले. परंतु जोश हॅझलवूडने बटलरचा ३४ धावांवर त्रिफळा उडवला आणि संपूर्ण स्टेडियममध्ये शांतता पसरली. अखेरीस हॅझलवूडने ओव्हर्टनला पायचीत पकडले आणि ऑस्ट्रेलियाच्या सर्व संघाने एकच जल्लोष केला.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 9, 2019 8:46 am

Web Title: ashes 2019 australia ashes trophy england tim paine steve waugh 18 years coincidence vjb 91
Next Stories
1 US Open : पाच तासांच्या झुंजीनंतर नदालला १९वे ‘ग्रँडस्लॅम’
2 युवा खेळाडूंच्या कामगिरीकडे लक्ष
3 प्रो कबड्डी लीग : दिल्ली, बंगाल विजयी
Just Now!
X