इंडोनेशियाकडून पराभूत; लक्ष्यचा आशियाई विजेत्या जोनाटनवर धक्कादायक विजय लक्ष्य सेनने आशियाई विजेत्या जोनाटन ख्रिस्तीवर धक्कादायक मात केल्यानंतरही भारताला आशिया सांघिक बॅडमिंटन स्पर्धेत उपांत्य फेरीत इंडोनेशियाकडून २-३ पराभव स्वीकारावा लागला. त्यामुळे भारताला स्पर्धेत कांस्यपदकावर समाधान मानावे लागले. भारताचे या स्पर्धेतील हे २०१६नंतरचे दुसरे कांस्यपदक ठरले. जागतिक क्रमवारीत ३१व्या स्थानी असलेल्या लक्ष्यने सातव्या क्रमवारीवरील जोनाटनला २१-१८, २२-२० असे नमवत दमदार विजय नोंदवून दिला. त्याआधीच्या एकेरीत अॅँथनी गिंटिंगकडून ६-२१ पिछाडीवर असलेल्या बी. साईप्रणितने सामना अर्धवट सोडला. एकेरीत शुभांकर डे याने २०व्या क्रमवारीवरील शेसार रुस्ताविटोला २१-१७, २१-१५ नमवले. मात्र चिराग शेट्टी आणि लक्ष्य सेन या जोडीचा दुहेरीत पराभव झाला.
