Asian Games 2018 Live : आशियाई खेळांच्या सातव्या दिवशी भारताने अखेर सुवर्ण पदक पटकावले. गोळाफेकपटू तजिंदर पाल सिंग याने भारताला सुवर्णकमाई करून दिली. त्याने २०.७५ मीटरची विक्रमी फेक केली आणि भारताला आजच्या दिवसातील पहिले सुवर्णपदक मिळवून दिले. त्याआधी स्क्वॅशमध्ये दिपीका पल्लिकल हिने कांस्यपदकाची कमाई करत आपले खाते उघडले होते. दिपीका पल्लिकलला उपांत्य सामन्यात मलेशियाच्या निकोल अॅन डेव्हिडकडून पराभव पत्करावा लागला. निकोलने दिपीकावर ७-११, ९-११, ६-११ अशा ३ सरळ सेट्समध्ये मात केली. दिपीकाचं आशियाई खेळांमधलं हे तिसरं पदक ठरलं आहे. २०१४ साली झालेल्या एशियाड स्पर्धेत दिपीकाने सांघिक आणि एकेरी स्पर्धेत कांस्यपदकाची कमाई केली होती. दुसरीकडे भारताच्या जोशना चिनप्पालाही कांस्यपदकावर समाधान मानावं लागलं. मलेशियाच्या शिवसंगरी सुब्रमण्यमने जोशनाचा पराभव केला. त्यापाठोपाठ जोशना चिनप्पा, सौरव घोषाल यांनीहि भारताला कांस्यपदकाची कमाई केली. याव्यतिरीक्त अॅथलेटिक्समध्ये भारताच्या मोहम्मद अनसने ४०० मी. शर्यतीमध्ये उपांत्य फेरी गाठली आहे. याचसोबत बॅडमिंटनमध्ये सायना नेहवाल, पी. व्ही. सिंधू यांनी उपांत्यपूर्व फेरीत प्रवेश मिळवला आहे.