Ind vs Aus 2nd Test Day 2 Live Updates - ऑस्ट्रेलियाविरुद्धच्या दुसऱ्या कसोटीत भारताने दुसऱ्या दिवसअखेर ३ बाद १७२ धावा केल्या. ऑस्ट्रेलियाचा पहिला डाव ३२६ धावांवर आटोपला. त्यास प्रत्युत्तर म्हणून कर्णधार विराट कोहली आणि उपकर्णधार अजिंक्य रहाणे या दोघांनी केलेल्या नाबाद भागीदारीच्या जोरावर भारताला या धावसंख्येपर्यंत मजल मारता आली. ऑस्ट्रेलियाकडून स्टार्कने २ तर हेजलवूडने १ बळी टिपला. विराट कोहली ८२ धावांवर तर रहाणे ५१ धावांवर खेळत आहे. या सामन्यात भारताच्या डावाची सुरूवात खराब झाली. उपहारापर्यंत भारताने ६ धावा करून मुरली विजयचा बळी गमवला. दुसऱ्या सत्रात राहुल २ धावा काढून त्रिफळाचित झाला. विराट कोहलीबरोबर अर्धशतकी भागीदारी करणारा पुजारा तिसऱ्या सत्राच्या सुरूवातीला २४ धावांवर झेलबाद झाला आणि भारताला तिसरा धक्का बसला. स्टार्कने त्याला यष्टीरक्षकाकरवी झेलबाद केले. त्याआधी दुसऱ्या दिवशी चांगली सुरुवात मिळाल्यानंतर अखेर भारतीय गोलंदाजांनी ऑस्ट्रेलियाच्या तळाच्या फलंदाजांना झटपट माघारी धाडले. इशांत शर्माने सर्वाधिक ४ बळी टिपत यजमानांचा डाव गुंडाळण्यात महत्वाची भूमिका बजावली. त्यामुळे ऑस्ट्रेलियाचा पहिला डाव सर्वबाद ३२६ वर आटोपला. अष्टपैलू पॅट कमिन्स त्रिफळाचित झाला आणि आजच्या दिवसातील भारताला पहिले यश मिळाले. कमिन्स ६६ चेंडूत १९ धावा करून बाद झाला. ३८ धावांची संयमी खेळी करणारा टीम पेन पायचीत झाला. बुमराहने त्याला बाद करत ऑस्ट्रेलियाला आठवा धक्का दिला. मिचेल स्टार्क १० चेंडूत ६ धावा करून बाद झाला आणि ऑस्ट्रेलियाचा नववा गडी बाद झाला. पंतने त्याचा झेल टिपला. पाठोपाठ हेजलवूडला शून्यावर बाद करत इशांतने ऑस्ट्रेलियाचा डाव गुंडाळला. तत्पूर्वी, ऑस्ट्रेलियाचा कर्णधार टीम पेन याने नाणेफेक जिंकून प्रथम फलंदाजीचा निर्णय घेतला. ऑस्ट्रेलियाचे सलामीवीर फिंच आणि हॅरिस यांनी अतिशय सावध पवित्रा घेत डावाला सुरुवात केली. ऑस्ट्रेलियाने पहिल्या सत्रात ठेवलेली फलंदाजीची संथ लय कायम ठेवत चहापानापर्यंत ३ बाद १४५ अशी मजल मारली. पहिल्या सत्रात एकही बळी न गमावलेल्या ऑस्ट्रेलियाने दुसऱ्या सत्रात ३ बळी गमावले. शेवटच्या सत्रात पीटर हॅंड्सकॉम्ब ७ धावा करून बाद झाला. विराट कोहलीने स्लिपमध्ये अफलातून झेल टिपत त्याला माघारी धाडले. इशांतने त्याचा काटा काढला. Wow, What a stunning catch from India captain Virat Kohli! #AUSvIND pic.twitter.com/HpO8m4L8in — Sachin Padwal (@sachin140778) December 14, 2018 खेळपट्टीवर स्थिरावलेल्या शॉन मार्शला ४५ धावांवर झेलबाद व्हावे लागले. त्यानंतर संयमी खेळी करणारा ऑस्ट्रेलियाचा ट्रेव्हिस हेड अर्धशतक (५८) ठोकून बाद झाला आणि पहिल्या दिवसाचा खेळ संपला.
