24 June 2018

News Flash

रवी शास्त्रींच्या हस्ते विराट कोहलीला ‘पॉली उम्रीगर पुरस्कार’

कोहलीला २०१६-१७ आणि २०१७- १८ या दोन्ही वर्षांसाठी सर्वोत्कृष्ट क्रिकेटरचा पुरस्कार मिळाला असून विराटला एकूण ३० लाख रुपयांचे पारितोषिक मिळाले आहे.

विराट कोहलीला दोन्ही मोसमांसाठी सर्वोत्कृष्ट क्रिकेटपटूचा पुरस्कार जाहीर करण्यात आला.

भारतीय क्रिकेट नियामक मंडळातर्फे (बीसीसीआय) दिला जाणारा वर्षातील सर्वोत्तम क्रिकेटपटूचा पुरस्कार अर्थात पॉली उम्रीगर पुरस्कार मंगळवारी विराट कोहलीला प्रदान करण्यात आला. कोहलीला २०१६-१७ आणि २०१७- १८ या दोन्ही वर्षांसाठी सर्वोत्कृष्ट क्रिकेटरचा पुरस्कार मिळाला असून विराटला एकूण ३० लाख रुपयांचे पारितोषिक मिळाले आहे.

बीसीसीआयने गेल्या आठवड्यात २०१६- १७ आणि २०१७- १८ वर्षांसाठीच्या पुरस्कारांची घोषणा केली होती. यात विराट कोहलीला दोन्ही मोसमांसाठी सर्वोत्कृष्ट क्रिकेटपटूचा पुरस्कार जाहीर करण्यात आला होता. तर महिलांमध्ये हरमनप्रीत कौरला २०१६- १७ साठी आणि स्मृती मंधानाला २०१७- १८ या मोसमातील कामगिरीसाठी पुरस्कार देण्यात आला. मंगळवारी बेंगळुरु येथील कार्यक्रमात हे पुरस्कार प्रदान करण्यात आले. विराट कोहलीला रवी शास्त्री यांनी पुरस्कार देऊन सन्मानित केले.

विराटने २०१६- १७ मध्ये १३ कसोटींमध्ये ७४ च्या सरासरीने १, ३३२ धावा तर २७ एकदिवसीय सामन्यांमध्ये ८४.२२ च्या सरासरीने १, ५१६ धावा केल्या. तर २०१७- १८ या वर्षात विराटने ६ कसोटींमध्ये ८९ च्या सरासरीने ८९६ धावा चोपल्या. या कामगिरीसाठी त्याला सर्वोत्कृष्ट खेळाडूचा पुरस्कार देण्यात आला.

२०१६- १७ मधील पुरस्कारांचे मानकरी

रणजी स्पर्धेतील सर्वोत्तम अष्टपैलू : परवेझ रसूल (जम्मू-काश्मीर)
देशांतर्गत क्रिकेटमधील सर्वोत्तम अष्टपैलू : कृणाल पंड्या
रणजीत सर्वाधिक धावा करणारा फलंदाज: पी के पांचाळ (गुजरात)
रणजीत सर्वाधिक विकेट घेणारा गोलंदाज: शाहबाज नदीम (झारखंड)
जगमोहन दालमिया ट्रॉफी (सर्वोत्कृष्ट महिला क्रिकेटपटू) : पूनम राऊत

२०१७- १८ मधील पुरस्कारांचे मानकरी
रणजी स्पर्धेतील सर्वोत्तम अष्टपैलू : जलज सक्सेना (केरळ)
देशांतर्गत क्रिकेटमधील सर्वोत्तम अष्टपैलू : दिवेश पठाणी
रणजीत सर्वाधिक धावा करणारा फलंदाज: मयांक अग्रवाल (कर्नाटक)
रणजीत सर्वाधिक विकेट घेणारा गोलंदाज: जलज सक्सेना (केरळ)
जगमोहन दालमिया ट्रॉफी (सर्वोत्कृष्ट महिला क्रिकेटपटू) : दीप्ती शर्मा

First Published on June 13, 2018 3:52 am

Web Title: bcci awards function 2018 virat kohli receives polly umrigar trophy smriti mandhana harmanpreet kaur