भारतीय कसोटी संघाचा फलंदाज चेतेश्वर पुजाराची भारतीय क्रिकेट नियामक मंडळाने(बीसीसीआय) केंद्राकडे अर्जुन पुरस्कारासाठी शिफारस केली. पुजारासोबतच महिला क्रिकेट संघाची सदस्य हरमनप्रीत कौर हिचेही नाव बीसीसीआयने सुचवले आहे. चेतेश्वर पुजारा आणि हरमनप्रीत कौर यांची नावं आम्ही अर्जुन पुरस्कारासाठी क्रीडा मंत्रालयाकडे पाठवली आहेत, अशी माहिती बीसीसीआयच्या अधिकाऱ्यांनी पीटीआयला दिली. पुजाराने गेल्या कसोटी हंगामात उल्लेखनीय कामगिरीची नोंद केली होती, तर हरमनप्रीतने मर्यादित षटकांच्या सामन्यांत लक्षवेधी कामगिरी केली. ऑस्ट्रेलियाविरुद्धच्या ट्वेन्टी-२० मालिकेत हरमनप्रीत भारताच्या विजयाची शिल्पकार ठरली होती. याशिवाय, आशिया चषकातही तिची कामगिरी महत्त्वपूर्ण ठरली होती. दुसऱ्या बाजूला चेतेश्वर पुजारा गेल्या कसोटी हंगामात भारताचा भरवशाचा फलंदाज राहिला. ऑस्ट्रेलियाविरुद्धच्या कसोटी मालिकेत टीम इंडियाच्या नाकी नऊ आले असताना पुजाराने मैदानात टिच्चून फलंदाजी करत संघाला तारले होते. भारताचा डाव सावरताना त्याने एका इनिंगमध्ये तब्बल ६७२ चेंडू खेळण्याचा विक्रम रचला. पुजाराने तेव्ह २०२ धावांची खेळी साकारली होती. पुजाराच्या या कामगिरीनंतर त्याला 'टेस्ट स्पेशलिस्ट' म्हणून ओळखले जाऊ लागले आहे.