News Flash

विश्वरुपम्

जगातील दिग्गज खेळाडूंचा भरणा असलेला स्पेन संघ.. समोर युवा आणि अननुभवी खेळाडूंकडून भरपूर अपेक्षा असलेला पाच वेळा विश्वविजेतेपद जिंकणारा ब्राझील.. पासिंगचा सुरेख मिलाफ असलेल्या स्पेनच्या

| July 2, 2013 05:25 am

जगातील दिग्गज खेळाडूंचा भरणा असलेला स्पेन संघ.. समोर युवा आणि अननुभवी खेळाडूंकडून भरपूर अपेक्षा असलेला पाच वेळा विश्वविजेतेपद जिंकणारा ब्राझील.. पासिंगचा सुरेख मिलाफ असलेल्या स्पेनच्या शिलेदारांना रोखून अतिशय प्रभावी आणि आश्वासक फुटबॉलचे प्रदर्शन करणाऱ्या ब्राझीलने विश्वविजेत्यांना ३-० असे नामोहरम केले आणि कॉन्फेडरेशन चषकावर सलग तिसऱ्यांदा मोहोर उमटवली. दोन गोल झळकावणारा फ्रेड आणि एक गोल लगावणारा नेयमार ब्राझीलच्या विजयाचे शिल्पकार ठरले. सुसाट वेगाने खेळ करणाऱ्या ‘फ्रेडेक्स’ने स्पर्धेत पाच गोल लगावत छाप पाडली.
आंतरराष्ट्रीय फुटबॉलवर वर्चस्व गाजवणाऱ्या स्पेनला चारीमुंडय़ा चीत करून ब्राझीलने चौथ्यांदा कॉन्फेडरेशन चषकावर नाव कोरले. या विजयासह यजमान ब्राझीलने २०१४मध्ये होणाऱ्या फिफा विश्वचषकासाठी आपण प्रबळ दावेदार आहोत, हा संदेश फुटबॉलजगताला दिला आहे.
ब्राझीलने स्पेनसाठी अचूक रणनीती आखली आहे, हे दुसऱ्या मिनिटालाच स्पष्ट झाले. हल्कने उजव्या कॉर्नरवरून दिलेल्या पासवर चेंडूवर ताबा मिळवताना स्पेनचे दोन बचावपटू गोलरक्षक आयकर कॅसिल्लास तसेच नेयमार आणि फ्रेड यांच्यात चढाओढ रंगली. गोलजाळ्याच्या समोर दोन मीटर अंतरावर चेंडूवर ताबा मिळवताना फ्रेड खाली पडला. चेंडूवर झडप घालण्यासाठी कॅसिल्लासने झेप घेतली. इतक्यात फ्रेडने खाली पडूनच चेंडूला किक मारली. चेंडू  कॅसिल्लासच्या डोक्यावरून थेट गोलजाळ्यात विसावला. त्यानंतर ऐतिहासिक माराकाना स्टेडियममध्ये उपस्थित असलेल्या ७८,००० चाहत्यांच्या आनंदाला उधाण आले. ‘विश्वविजेते परत आलेत,’ अशा घोषणांनी स्टेडिमम दणाणले.
४४व्या मिनिटाला नेयमारने ड्रिब्लिंगचे सुरेख कौशल्य दाखवत स्पेनच्या तीन बचावपटूंना चकवून गोलक्षेत्रात आगेकूच केली. त्याने चेंडू ऑस्करकडे सोपवला. सर्वाच्या पुढे असल्यामुळे ‘ऑफ साइड’ होऊ नये, यासाठी नेयमार काही पावले मागे आला. त्याच वेळी ऑस्करने पुन्हा चेंडू नेयमारकडे तटवला. डाव्या बाजूने पुढे सरकून नेयमारने डाव्या पायाने मारलेला जोरदार फटका कॅसिल्लासला भेदून गोलजाळ्यात गेला. पहिल्या सत्रात २-० अशी आघाडी घेतल्यामुळे ब्राझीलचा विजय जवळपास निश्चित झाला होती. स्पेनने अनेक चाली रचल्या, पण गोल झळकावण्यात त्यांना अपयश आले. दुसऱ्या सत्राचा खेळ सुरू झाल्यानंतर दुसऱ्याच मिनिटाला फ्रेडने दुसरा गोल लगावला. उजव्या बाजूने हल्कने दिलेल्या पासवर फ्रेडने मारलेला फटका गोलजाळ्याच्या खांबाला लागून आत गेला. ब्राझीलने ३-० अशी आघाडी कायम ठेवत चषकावर कब्जा केला.

पुरस्कार विजेते
गोल्डन बॉल : नेयमार
गोल्डन शू : फर्नाडो टोरेस
गोल्डन ग्लोव्हज् : ज्युलियो सेसार
सिल्व्हर बॉल : आंद्रेस इनियेस्टा
सिल्व्हर शू : फ्रेड
ब्राँझ बॉल : पॉलिन्हो
ब्राँझ शू : नेयमार
स्वप्नवत कामगिरी : स्पेन

ब्राझील       स्पेन
३                   ०
फ्रेड  (२, ४७ व्या मिनिटाला)
नेयमार (४४ व्या मिनिटाला)

कॉन्फेडरेशन चषकाच्या विजयाने आत्मविश्वास उंचावला असला तरी पुढील वर्षीचा फिफा विश्वचषक पटकावण्यासाठी आम्हाला खडतर आव्हानांचा सामना करावा लागेल. इतक्या सहजतेने विजय मिळणार नाहीत. मात्र प्रेक्षकांचा पाठिंबा आणि याच कामगिरीची पुनरावृत्ती केल्यास फिफा विश्वचषक उंचावणे कठीण जाणार नाही.
लुइझ फिलिप स्कोलारी, ब्राझीलचे प्रशिक्षक

प्रतिस्पर्धी संघ कोणताही असो, देशातर्फे खेळताना मी सर्वोत्तम कामगिरी करण्याचा प्रयत्न करतो. आम्ही अपेक्षेपेक्षा चांगला खेळ केला. ब्राझीलवासियांच्या चेहऱ्यावर आनंद परतला असला तरी आम्हाला विजेतेपदाने हुरळून जाऊन चालणार नाही. पुढील वर्षी होणाऱ्या फिफा विश्वचषक स्पर्धेत चांगली कामगिरी करण्याचा माझा मानस आहे.
 नेयमार, ब्राझीलचा आघाडीवीर.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on July 2, 2013 5:25 am

Web Title: brazil beats spain 3 0 to win confederations cup
Next Stories
1 नव्या युगाची आशा!
2 सेरेनाला पराभवाचा धक्का
3 हार के बाद ही जीत है..
Just Now!
X