विश्व अजिंक्यपद बॅडमिंटन स्पर्धेतील अंतिम सामन्यात भारताच्या पी. व्ही. सिंधूला जपानच्या नोझोमी आकुहाराने पराभूत केले. निसटत्या पराभवानंतरही सिंधूची क्रेझ कमी झालेली नाही. अंतिम सामन्यानंतर ग्लासगोच्या मैदानाबाहेर भारतीय चाहते सायना नेहवाल आणि सिंधूची आतुरतेने वाट पाहताना दिसले. या चाहत्यांमध्ये कॅरोलिना मरीनची आई देखील भारतीय बॅडमिंटनपटूंच्या खेळानं प्रभावित झाल्याचे पाहायला मिळाले. हो! तिच मरीन जिच्याकडून सिंधूला ऑलिम्पिकच्या अंतिम सामन्यात पराभव स्वीकारावा लागला होता. अंतिम सामन्यानंतर कोर्टच्या बाहेर टोनी मरीन या सायना नेहवाल आणि पी. व्ही. सिंधूसोबत सेल्फी घेताना दिसल्या. भारतीय चाहते ज्या रांगेत आपल्या स्टारची वाट पाहत उभे होते. त्याच रांगेत टोनी मरीन सिंधू आणि सायनाची वाट पाहत उभ्या होत्या. भारतीय बॅडमिंटन स्टारसोबत सेल्फी घेतल्यानंतर टोनी यांनी सिंधूची आई विजयालक्ष्मी आणि सानियाचे वडील हरवीर नेहवाल यांच्यासोबतही फोटो सेशन केलं. Among the Indian fans waiting for @Pvsindhu1 and @NSaina was Carolina Marin's mother as well. What a lady pic.twitter.com/ZJPc2xXgzS — Abhijeet Kulkarni (@abk6580) August 27, 2017 ऑलिम्पिक स्पर्धेत सुवर्णपदक पटकवणारी स्पेनची कॅरोलिनाने २०१५ ची विश्व अजिंक्यपद बॅडमिंटन स्पर्धा जिंकली होती. पण यंदाच्या स्पर्धेत तिला अपयशाचा सामना करावा लागला. उपांत्यपूर्व फेरीत जपानच्या नोझोमी आकुहाराने कॅरोलिनाला १८-२१, २१-१४, १५-२१ असे पराभूत केले होते. त्यानंतर अंतिम सामन्यात नोझोमीने सिंधूला धक्का देत सुवर्ण पदकाची कमाई केली. त्यामुळे सिंधूला रौप्य पदकावर समाधान मानावे लागले. दुसरीकडे भारताची फुलराणी सायना नेहवालने या स्पर्धेत कास्य पदक पटकवले होते. रिओ ऑलिम्पिकनंतर इंडिया ओपन सुपर सीरिज स्पर्धेत सिंधूने मरीनला सरळ गेम्समध्ये नमवण्याची किमया साधली होती.
