केन विल्यम्सनच्या शानदार शतकी खेळीच्या जोरावर नॉर्दर्न ड्रिस्ट्रिक्ट्स संघाने चॅम्पियन्स लीग ट्वेन्टी-२० स्पर्धेत डकवर्थ-लुइस पद्धतीद्वारे केप कोब्राज संघावर ३३ धावांनी विजय मिळवला. नॉर्दर्न संघासाठी अँटॉन डेव्हविच आणि विल्यम्सन यांनी १४० धावांची खणखणीत सलामी दिली. डेव्हविचने ६७ धावा केल्या. ब्रॅडले वॉटलिंगने २० चेंडूत ३२ धावांची खेळी करत विल्यम्सनला चांगली साथ दिली. विल्यम्सनने नाबाद १०१ धावांची खेळी केली. प्रत्युत्तरादाखल केप कोब्राजची सुरुवात खराब झाली. स्टॅअिन व्हॅन झायल भोपळाही फोडू शकला नाही. हशीम अमला २० धावा करून तंबूत परतला. २ बाद ४४ अशी स्थिती असताना पावसाचे आगमन झाले. पावसाचा जोर वाढतच गेल्याने डकवर्थ-लुइस पद्धतीद्वारे नॉर्दर्न डिस्ट्रिक्ट संघाला विजयी घोषित करण्यात आले. विल्यम्सनला सामनावीर पुरस्काराने गौरवण्यात आले.
