आयपीएलचा तेरावा हंगाम खेळण्यासाठी युएईत दाखल झालेल्या चेन्नई सुपरकिंग्ज संघासाठी शनिवारचा दिवस हा दुहेरी धक्के देणारा होता. शुक्रवारी संध्याकाळी संघाचा जलदगती गोलंदाज दिपक चहर आणि सपोर्ट स्टाफमधील १२ जणांना करोनाची लागण झाली. यानंतर शनिवारी ऋतुराज गायकवाडचा करोना अहवाल पॉझिटीव्ह आल्यामुळे संघाच्या चिंतेत भर पडली. याचसोबत चेन्नईच्या संघातील महत्वाचा खेळाडू सुरेश रैनानेही यंदाच्या हंगामातून माघार घेतल्यामुळे CSK संघासमोर संकट निर्माण झालं. आयपीएलसाठी महिनाभर आधीपासून तयारी करणारा, चेन्नईच्या ट्रेनिंग कँपमध्ये सहभागी होणाऱ्या रैनाने अचानक माघार घेण्याचा निर्णय का घेतला असेल यावरुन चर्चांचा उधाण आलं होतं. CSK चे सीईओ काशी विश्वनाथन यांनी सकाळी माहिती देताना रैनाने खासगी कारणांमुळे माघार घेत असल्याचं सांगितलं. परंतू टाइम्स ऑफ इंडियाने दिलेल्या वृत्तानुसार, संघातील खेळाडूंना करोनाची झालेली लागण आणि अशा परिस्थितीत ३ महिने घरापासून दूर राहण्याच्या भीतीमुळे सुरेश रैनाने माघार घेण्याचा निर्णय घेतला. "शुक्रवारी संध्याकाळी चेन्नईच्या संघात चांगलीच खळबळ माजली होती. रैनाने वारंवार आपले सहकारी, प्रशिक्षक स्टिफन प्लेमिंग, धोनी यांना फोन करुन आपलं म्हणणं मांडण्याचा प्रयत्न केला. धोनीने सुरेश रैनाची समजूत काढण्याचाही प्रयत्न केला परंतू त्याचा काही फायदा झाला नाही. तो खूप घाबरलेला होता आणि चिंतेतही दिसत होता. त्यामुळे संघातील सर्वांना आता रैनाला दुबईत थांबवण्यात काहीच अर्थ नसल्याचं कळून आलं. तो खूप घाबरलेला होता. संघासाठी तयार करण्यात आलेल्या Bio Security Bubble मध्ये राहणं त्याला जमत नव्हतं. ता काही केल्या शांत होत नव्हता, म्हणूनच संघ व्यवस्थापनाने त्याला परत जाण्याची परवानगी दिली." CSK संघातील महत्वाच्या सूत्रांनी टाइम्स ऑफ इंडियाला माहिती दिली. CSK चे सीईओ काशी विश्वनाथन यांनी रैनाने भारतात परतण्याचा निर्णय घेतल्यानंतर संघातर्फे एक स्टेटमेंट जाहीर केलं. Suresh Raina has returned to India for personal reasons and will be unavailable for the remainder of the IPL season. Chennai Super Kings offers complete support to Suresh and his family during this time. KS Viswanathan CEO — Chennai Super Kings (@ChennaiIPL) August 29, 2020 परंतू सुरेश रैनाच्या माघार घेण्याच्या निर्णयामुळे आयपीएल गव्हर्निंग काऊन्सिल आणि बीसीसीआयसमोर मोठा प्रश्न निर्माण झाला आहे. Bio Secure Bubble वातावरणात प्रत्येक खेळाडूची मानसिक स्थिती कशी आहे याकडेही बीसीसीआय व सर्व संघ व्यवस्थापकांना लक्ष द्यावं लागणार आहे. दरम्यान करोना अहवाल पॉझिटीव्ह आलेले CSK चे खेळाडू क्वारंटाइन झाले असून इतर खेळाडूंनाही खबददारीचा उपाय म्हणून क्वारंटाइन करण्यात आलंय.
