डेन्मार्क ओपन बॅडमिंटन स्पर्धेत भारताच्या पी. व्ही. सिंधूला पहिल्याच फेरीत पराभवाचा धक्का बसला आहे. अमेरिकेच्या बिवॅन झँगने सिंधूची झुंज 3 सेटमध्ये 17-21, 21-16, 18-21 अशी मोडून काढली. या स्पर्धेत सिंधू आणि सायनावर भारताची मदार होती. मात्र सिंधू पहिल्याच फेरीत स्पर्धेबाहेर गेल्यामुळे आता भारतीय क्रीडाप्रेमींच्या आशा सायना नेहवालवर आहेत. या दोन्ही खेळाडूंमधला सामना अवघ्या 56 मिनीटांमध्ये आटोपला. झँगकडून पराभूत होण्याची सिंधूची ही तिसरी वेळ ठरली आहे. यावर्षी फेब्रुवारी महिन्यामध्ये झालेल्या Indian Open स्पर्धेच्या अंतिम फेरीत झँगने सिंधूवर मात केली होती. त्यामुळे आपल्या खराब फॉर्ममधून सिंधू किती लवकर सावरते हे पाहणं महत्वाचं ठरणार आहे.