सुमारे १२ वर्षे आंतरराष्ट्रीय क्रिकेट सामना न खेळलेला डावखुरा क्रिकेटपटू दिनेश मोंगिया याने क्रिकेटमधून निवृत्ती स्वीकारली. १७ सप्टेंबरला त्याने हा महत्वाचा निर्णय घेतला. २००३ साली झालेल्या विश्वचषक स्पर्धेसाठी व्ही व्ही एस लक्ष्मणच्या ऐवजी भारतीय संघात दिनेश मोंगियाची निवड करण्यात आली होती. त्यामुळे तो अधिक चर्चेत आला होता. त्यातही महत्वाची बाब म्हणजे त्या स्पर्धेत भारताला उपविजेतेपद मिळाले होते. दिनेश मोंगिया पंजाबमध्ये लहानाचा मोठा झालेल्या दिनेश मोंगियाने १९९५-९६ साली क्रिकेटमध्ये पदार्पण केले. देशांतर्गत स्पर्धांमध्ये त्याने धडाकेबाज कामगिरी केली होती आणि खूप धावा जमवल्या होत्या. उत्तम फलंदाजीसह उत्तम लेगस्पिनर म्हणूनही त्याने काऊंटी क्रिकेटमध्ये स्वत:ला सिद्ध केले. २००४ साली स्टुअर्ट लॉ च्या जागी दिनेश मोंगियाला लँकशायर संघात स्थान देण्यात आले होते. त्यानंतर २००५ मध्ये त्याला लीस्टरशायर (Leicestershire) संघाने पूर्णवेळ करारबद्ध केले. इतरही काही स्पर्धांमध्ये त्याने विविध संघांचे प्रतिनिधित्व केले. दिनेश मोंगियाने प्रथम श्रेणी क्रिकेटमध्ये ८ हजारांहून अधिक धाला केल्या. त्यात त्याने सर्वोत्तम ३०८ धावांची खेळी केली. तसेच २७ शतके आणि २८ अर्धशतके झळकावली. अ-श्रेणी क्रिकेटमध्येही त्याची कामगिरी चांगली होती. त्यात त्याने १० शतके आणि २६ अर्धशतकांच्या बळावर १९८ सामन्यांत ५ हजारांहून अधिक धावा केल्या. २००१ साली त्याने पुण्यातून आंतरराष्ट्रीय क्रिकेटमध्ये पदार्पण केले. त्या सामन्यात त्याला फारशी चांगली कामगिरी करता आली नाही, पण त्यानंतर झिम्बाब्वेविरूद्ध त्याने १४७ चेंडूत कारकिर्दीतील सर्वोत्तम नाबाद १५९ धावा केल्या. निवृत्तीनंतर आता मोंगिया प्रशिक्षकाच्या भूमिकेत दिसणार आहे.