भारत विरुद्ध इंग्लंड यांच्यातील तिसऱ्या वन-डे सामन्याआधी इंग्लंडच्या गोटात चिंतेचं वातावरण पसरलं आहे. सलामीवीर जेसन रॉय दुसऱ्या सामन्यात दुखापतग्रस्त झाल्यामुळे खबरादारीचा उपाय म्हणून इंग्लंडने सॅम बिलींग्जला संघात पाचारण केलं आहे. लॉर्ड्सवरील दुसऱ्या सामन्यात रॉयच्या बोटाला दुखापत झाली होती. हेडिंग्लेच्या मैदानात खेळवण्यात येणाऱ्या निर्णायक सामन्याआधी जेसन रॉय फिटनेस टेस्ट देणार आहे. यानंतर त्याच्या तिसऱ्या सामन्यातील सहभागाबद्दल निर्णय घेतला जाणार आहे. याआधीही इंग्लंडने डेवीड मालान आणि सॅम कुरन यांना संघातून विश्रांती देत जेम्स विन्सला संघात जागा दिली आहे. त्यामुळे उद्याच्या सामन्यात जेसन रॉय खेळतो की नाही याकडे सर्वांचं लक्ष असणार आहे.
