India vs England Test Series : ऑस्ट्रेलिया दौऱ्याचा शेवट गोड करणाऱ्या टीम इंडियासाठी पुढचं आव्हान तयार आहे. पाच फेब्रुवारीपासून भारत आणि इंग्लड यांच्यातील क्रिकेट मालिकेला सुरुवात होणार आहे. पहिल्या दोन कसोटी सामन्यासाठी चेतन शर्मा यांच्या अध्यक्षतेखालील नवीन निवड समितीनं १८ जणांच्या संघाची घोषणा केली आहे. पितृत्वाच्या रजेनंतर भारताचा कर्णधार विराट कोहली तसेच वेगवान गोलंदाज इशांत शर्मा आणि अष्टपैलू हार्दिक पांड्या यांचं दुखापतीनंतर भारतीय संघात पुनरागमन झालं आहे. espncricinfo याबाबतचं वृत्त दिलं आहे. पृथ्वी शॉ, नवदीप सैनी आणि टी. नटराजन यांना डच्चू देण्यात आला आहे. अक्षर पटेल याला पहिल्यांदाच कसोटीमध्ये स्थान देण्यात आलं आहे. मांडीचे स्नायू ताणले गेल्यामुळे इशांत ऑस्ट्रेलिया दौऱ्याला मुकला होता. त्याने सय्यद मुश्ताक अली क्रिकेट स्पर्धेत पुनरागमन केले. त्यामुळे इशांत शर्माची भारतीय संघात निवड करण्यात आली आहे. इशांत शर्मानं फेब्रुवारी २०२० मध्ये अखेरचा कसोटी सामना खेळला होता. आयपीएलमध्ये दुखापत झाल्यामुळे त्याला ऑस्ट्रेलिया दौऱ्यातून वगळण्यात आलं होतं. त्याशिवाय कर्णधार विराट कोहली पितृत्वाच्या रजेनंतर पुन्हा एकदा भारतीय संघाचं नेतृत्व करण्यास सज्ज आहे. २०१८ नंतर हार्दिक पांड्याचं कसोटी संघात पुनरागमन झालं आहे. TEAM - Virat Kohli (Capt), Rohit Sharma, Mayank Agarwal, Shubman Gill, Cheteshwar Pujara, Ajinkya (VC), KL Rahul, Hardik, Rishabh Pant (wk), Wriddhiman Saha (wk), R Ashwin, Kuldeep Yadav, Axar Patel, Washington Sundar, Ishant Sharma, Jasprit Bumrah, Md. Siraj, Shardul Thakur — BCCI (@BCCI) January 19, 2021 जसप्रीत बुमराह, मोहम्मद सिराज आणि शार्दुल ठाकुर यांनी ऑस्ट्रेलियामध्ये दमदार कामगिरी केली होती. यांचं संघातील स्थान कायम आहे. सिराजनं तीन कसोटी सामन्यात १३ विकेट घेतल्या होत्या. तर शार्दुल ठाकूरनं एकमेव कसोटी सामन्यात अर्धशतकी खेळी करत ७ बळी घेतले आहेत. असा आहे भारतीय संघ - सलामीवीर : रोहित शर्मा, शुबमन गिल, मयांक अगरवाल मधल्या फळीतील फलंदाज : चेतेश्वर पुजारा, विराट कोहली (कर्णधार), अजिंक्य रहाणे आणि के. एल. राहुल यष्टीरक्षक - ऋषभ पंत , वृद्धीमान साहा अष्टपैलू - हार्दिक पांड्या, वॉशिंगटन सुंदर, अक्षर पटेल फिरकीपटू - आर. अश्विन, कुलदीप यादव वेगवान गोलंदाज - जसप्रीत बुमराह, इशांत शर्मा, मोहम्मद सिराज आणि शार्दुल ठाकूर नेट बॉलर - अंकित राजपूत, आवेश खान, संदिप वारियर, के. गौतम आणि सौरभ कुमार Standbyes:: के. एस. भरत (यष्टीरक्षक), शाहबाज नदीप, राहुल चहर आणि अभिमान्य इश्वरन
