पहिल्या वन-डे सामन्यात भारताकडून पराभवाचा सामना करावा लागल्यानंतर यजमान इंग्लंडच्या अडचणीत आणखी भर पडली आहे. सलामीवीर अॅलेक्स हेल्स दुखापतीमुळे वन-डे मालिकेतून बाहेर पडला आहे. पहिल्या सामन्याआधी सरावादरम्यान हेल्स दुखापतग्रस्त झाला होता. यानंतर पहिल्या सामन्यात त्याचा इंग्लंडच्या संघात समावेश करण्यात आला नव्हता. मात्र आता हेल्स मालिकेमधून बाहेर पडला आहे. ऑस्ट्रेलियाविरुद्ध ५ वन-डे सामन्यांच्या मालिकेत अॅलेक्स हेल्सने आपल्या फलंदाजीची छाप पाडली होती. यानंतर ३ टी-२० सामन्यांच्या मालिकेत दुसऱ्या टी-२० सामन्यात हेल्सने नाबाद ५८ धावांची खेळी केली होती. या सामन्यात इंग्लंडचा संघ विजयी ठरला होता. पहिला वन-डे सामना गमावल्यानंतर इंग्लंडचा कर्णधार इयॉन मॉर्गनने हेल्सच्या दुखापतीबद्दल माहिती दिली. भारत व इंग्लंड यांच्यातील दुसरा वन-डे सामना १४ जुलैरोजी लॉर्ड्सच्या मैदानावर खेळवण्यात येणार आहे. अवश्य वाचा - रोहितच्या शतकापुढे इंग्लंड निष्रभ, भारत ८ गडी राखून विजयी
