कर्णधार ईऑन मॉर्गन (५७ धावा), जोस बटलर (५७) आणि जॉनी बेअरस्टो (६४) या तिघांनी झळकावलेल्या धडाकेबाज अर्धशतकांच्या बळावर इंग्लंडने तिसऱ्या ट्वेन्टी-२० क्रिकेट सामन्यात दक्षिण आफ्रिकेवर पाच गडी आणि पाच चेंडू राखून मात केली. या विजयासह इंग्लंडने तीन सामन्यांच्या मालिकेत २-१ असे यश संपादन केले. प्रथम फलंदाजी करताना हेन्रीच क्लासेन (६६) आणि तेम्बा बव्हुमा (४९) यांनी केलेल्या फटकेबाजीमुळे दक्षिण आफ्रिकेने २० षटकांत ६ बाद २२२ धावांचा डोंगर उभारला. प्रत्युत्तरात इंग्लंडने १९.१ षटकांतच विजयी लक्ष्य गाठले. मॉर्गनने तब्बल सात षटकारांसह २२ चेंडूंतच ५७ धावा फटकावल्या. मॉर्गनच सामनावीर आणि मालिकावीर पुरस्काराचा मानकरी ठरला.
