हैदराबाद क्रिकेट असोसिएशनने (एचसीए) यंदा आयपीएल सामन्यांचे आयोजन करण्यासाठी बीसीसीआयला प्रस्ताव दिला आहे. एचसीएच्या मते, करोना विषाणूमुळे भारतीय क्रिकेट नियामक मंडळाला (बीसीसीआय) जागा बदलण्याची इच्छा असेल, तर ते राजीव गांधी आंतरराष्ट्रीय क्रिकेट स्टेडियममध्ये सामन्यांचे आयोजन करण्यास सज्ज आहेत. हैदराबाद क्रिकेट असोसिएशनचा अध्यक्ष आणि माजी क्रिकेटपटू मोहम्मद अझरुद्दीनने ट्विट केले, की अशा कठीण काळात आपण एकमेकांच्या पाठीशी उभे राहिले पाहिजे. आयपीएलचे आयोजन सुरळीत व्हावे यासाठी एचसीएने सामन्यांचे आयोजन करण्याचा प्रस्ताव दिला आहे. In these difficult times there is all the more reasons for us to stand by each other. Hyderabad Cricket Association would like to offer its facilities to @BCCI to ensure that IPL2021 is conducted in safe and secure venues. — Mohammed Azharuddin (@azharflicks) April 4, 2021 बीसीसीआयने हैदराबादला आयपीएल 2021चे पर्यायी ठिकाण म्हणून ठेवले आहे. मात्र, बोर्डाकडून यासंबधी कोणतेही अधिकृत विधान आलेले नाही. करोना रुग्णसंख्येच्या वाढत्या पार्श्वभूमीवर महाराष्ट्र सरकारने शुक्रवार ते सोमवार संपूर्ण लॉकडाऊन आणि इतर दिवशी कडक निर्बंध जाहीर केले. या निर्बंधानंतर मुंबईतील आयपीएल सामन्यांबाबत प्रश्नचिन्ह निर्माण झाले होते. बीसीसीआय अध्यक्ष सौरव गांगुलीने आयपीएल सामने मुंबईतच खेळवणार असल्याचे स्पष्ट केले. आता महाराष्ट्र सरकारनेही आयपीएलला परवानगी दिली आहे. आयपीएल 2021 आणि करोना आयपीएलच्या आगामी हंगामापूर्वी विराट कोहलीच्या रॉयल चॅलेंजर्स बंगळुरू (आरसीबी) संघाला मोठा धक्का बसला आहे. संघाचा अनुभवी सलामीवीर देवदत्त पडिक्कल करोना चाचणीत पॉझिटिव्ह आढळला आहे. देवदत्तपूर्वी, दिल्ली कॅपिटल्सचा स्टार फिरकीपटू अक्षर पटेल करोनाच्या चाचणीत पॉझिटिव्ह आढळला. यंदाच्या आयपीएलमध्ये करोनाची लागण झालेला अक्षर हा दुसरा आणि देवदत्त तिसरा खेळाडू आहे. कोलकाता नाइट रायडर्सचा खेळाडू नितीश राणाला करोनाने ग्रासले होते. मात्र, त्यानंतर तो निगेटिव्ह आढळला. चेन्नई सुपर किंग्जच्या कंटेट टीमच्या सदस्यालाही करोनाची लागण झाली आहे.
