इंग्लंड चांगल्या स्थितीत असताना त्यांना दुसरा धक्का बसला. ६५ चेंडूत ८५ धावांवर खेळताना जेसन रॉयला बाद ठरवण्यात आले. कमिन्सने उसळत्या चेंडूवर त्याचा बळी घेतला. पण रिप्लेमध्ये तो बाद नसल्याचे स[स्पष्ट दिसून आले. पंचांनी बाद दिल्यानंतर त्यांच्याशी वाद घालतच तो मैदानाबाहेर गेला. बेअरस्टोच्या वेळी रिव्ह्यू गमावल्यामुळे रॉयला DRS चा आधार घेता आला नाही.

चांगली सुरुवात मिळाल्यानंतर सलामीवीर जॉनी बेअरस्टो बाद झाला. बेअरस्टोने रिव्ह्यूचा पर्याय स्वीकारला पण त्यातही त्याला बाद ठरवण्यात आले.

सलामीवीर जेसन रॉय याने ५१ चेंडूत तुफान फटकेबाजी करत दमदार अर्धशतक ठोकले. ७ चौकार आणि २ षटकार खेचत त्याने आपले अर्धशतक पूर्ण केले आणि इंग्लंडला मजबूत स्थितीत पोहोचवले.

२२४ धावांच्या माफक आव्हानाचा पाठलाग करताना इंग्लंडचे सलामीवीर जेसन रॉय आणि जॉनी बेअरस्टो या दोघांनी सावध खेळी केली आणि १० व्या षटकात इंग्लंडला अर्धशतकी मजल मारून दिली.

एकीकडे गडी बाद होताना स्टीव्ह स्मिथने झुंजार ८५ धावांची खेळी केली. या खेळीत त्याने ६ चौकार लगावले. पण चोरटी धाव घेताना स्मिथ धावबाद झाला. पाठोपाठ मिचेल स्टार्कदेखील २९ धावा काढून माघारी परतला.

अष्टपैलू खेळाडू पॅट कमिन्स स्वस्तात माघारी परतला. त्याने १० चेंडूत ६ धावा केल्या.

फटकेबाज खेळी करण्याच्या प्रयत्नात मॅक्सवेल झेलबाद झाला. २ चौकार आणि १ षटकार खेचत २३ चेंडूत २२ धावांवर तो माघारी परतला.

कॅरी पाठोपाठ मार्कस स्टॉयनीस आदिल रशिदच्या फिरकीचा शिकार ठरला. २ चेंडूत तो शून्यावर पायचीत झाला.

स्मिथच्या साथीने अलेक्स कॅरीने चांगली भागीदारी केली. पण अर्धशतकाच्या जवळ पोहोचल्यावर कॅरी झेलबाद झाला. ७० चेंडूत ४ चौकारांसह ४६ धावा केल्या.

नवखा पीटर हँड्सकॉम्ब १२ चेंडूत ४ धावा काढून माघारी परतला. वोक्सने त्याला त्रिफळाचित केले.

ऑस्ट्रेलियाकडून दमदार कामगिरी करणारा डेव्हिड वॉर्नर आजच्या सामन्यात लौकिकाला साजेसा खेळ करू शकला नाही. तो २ चौकार लगावून ९ धावांवर बाद झाला.

जोफ्रा आर्चरच्या पहिल्याच चेंडूवर कर्णधार फिंच शून्यावर बाद झाला आणि ऑस्ट्रेलियाला पहिला धक्का बसला. पंचांच्या निर्णयावर फिंचने रिव्ह्यू घेतला मात्र तिसऱ्या पंचांनीही त्याला बाद ठरवले.