News Flash

World Cup 2019 : यजमान संघाची विश्वविजेतेपदाची हॅटट्रिक

अंतिम सामन्यात न्यूझीलंडला पराभूत करून उंचावला विश्वचषक

विश्वचषक स्पर्धा २०१९ च्या अंतिम सामन्यात सुपर ओव्हरच्या माध्यमातून इंग्लंड नवा विश्वविजेता ठरला. न्यूझीलंडने ५० षटकात २४१ धावा केल्या होत्या. या आव्हानाचा पाठलाग करताना इंग्लंडनेदेखील २४१ धावाच केल्या. त्यामुळे सामन्यात सुपर ओव्हर खेळवण्यात आली. सुपर ओव्हरमध्येही सामना अनिर्णित राहिला. त्यामुळे सर्वाधिक चौकार-षटकारांच्या निकषावर इंग्लंडला विश्वविजेता ठरवण्यात आले.

इंग्लंडच्या या विजयामुळे यजमान संघाने विश्वचषक उंचावण्याची ही हॅटट्रिक ठरली. या आधी २०११ मध्ये झालेल्या विश्वचषक स्पर्धेत भारताकडे यजमानपद होते. तो विश्वचषक भारतीय संघाने जिंकला होता. तर २०१५ साली विश्वचषक स्पर्धेचे यजमानपद संयुक्तपणे ऑस्ट्रेलिया आणि न्यूझीलंड यांच्याकडे होते. तो विश्वचषक ऑस्ट्रेलियाच्या संघाने जिंकला होता. त्या पाठोपाठ २०१९ चा विश्वचषक इंग्लंडने उंचावला. या विश्वचषक स्पर्धेचे यजमानपद इंग्लंडकडे होते. त्यामुळे यजमान संघाची विश्वविजेतेपदाची हॅटट्रिक झाली.

दरम्यान, नाणेफेक जिंकून न्यूझीलंडने प्रथम फलंदाजीचा निर्णय घेतला. पण त्यांचा हा निर्णय फसला. इंग्लंडच्या वेगवान माऱ्यापुढे न्यूझीलंडला केवळ २४१ धावांपर्यंतच मजल मारता आली. न्यूझीलंडकडून एक बाजू लावून धरत सलामीवीर हेन्री निकोल्स याने संयमी अर्धशतक केले. त्याने ५५ धावांची खेळी केली. तर डावाच्या शेवटच्या टप्प्यात टॉम लॅथम याने ४७ धावांची उपयुक्त खेळी केली. इतर फलंदाजांना मात्र चांगली खेळी करता आली नाही. ख्रिस वोक्स आणि लिअम प्लंकेट या दोघांनी ३-३ बळी टिपले.

या आव्हानाचा पाठलाग करताना इंग्लंडची सुरुवात अत्यंत खराब झाली. पण बेन स्टोक्स आणि जोस बटलर या दोघांनी मोठी भागीदारी करून इंग्लंडच्या आशा पल्लवित केल्या. या दोघांनीही अर्धशतकी खेळी केली. सामन्यात बटलर बाद झाल्यावर इंग्लंडच्या आशा काहीशा मावळल्या पण स्टोक्सने शेवटपर्यंत तग धरून सामना सुपर ओव्हरमध्ये नेला. सुपर ओव्हरमध्येही सामना बरोबरीत (१५ धावा) सुटला, त्यामुळे मूळ सामन्यातील चौकार षटकारांच्या निकषावर इंग्लंडला नवा विश्वविजेता जाहीर करण्यात आले.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on July 15, 2019 8:26 am

Web Title: icc cricket world cup 2019 host country wins world cup trophy hat trick team india australia england vjb 91
Next Stories
1 भारताच्या पराभवाला धोनीच जबाबदार, युवराज सिंहच्या वडिलांचे गंभीर आरोप
2 Video : सुपरओव्हरचं थरारनाट्य आणि इंग्लंडचा रोमहर्षक विजय
3 World Cup 2019 Final : सीमारेषेवर ट्रेंट बोल्टचं पाऊल फसलं, न्यूझीलंडने विजेतेपदाची संधी गमावली
Just Now!
X