भारतीय संघाविरुद्ध टी-२० मालिका गमावल्यानंतर, न्यूझीलंडच्या चिंतेत आणखी भर पडली आहे. तिसऱ्या टी-२० सामन्यात धडाकेबाज खेळी करणारा न्यूझीलंडचा कर्णधार केन विल्यमसन चौथ्या टी-२० सामन्यातून बाहेर पडला आहे. विल्यमसनच्या डाव्या खांद्याला दुखापत झालेली आहे, त्याच्या बदली संघातला अनुभवी गोलंदाज टीम साऊदी चौथ्या सामन्यात न्यूझीलंडचं नेतृत्व करेल.

तिसऱ्या टी-२० सामन्यात क्षेत्ररक्षणादरम्यान विल्यमसनला ही दुखापत झाली होती. मात्र चौथ्या टी-२० सामन्यात विल्यमसन खेळू शकला नसला तरीही अखेरच्या टी-२० सामन्यापर्यंत तो पुनरागमन करेल अशी माहिती, न्यूझीलंडच्या संघ व्यवस्थापनाने दिली आहे. दरम्यान न्यूझीलंडच्या धरतीवर भारतीय संघाने टी-२० मालिका जिंकण्याची ही पहिलीच वेळ ठरली आहे. टी-२० मालिकेनंतर भारतीय संघ न्यूझीलंडमध्ये ३ वन-डे आणि २ कसोटी सामन्यांची मालिका खेळणार आहे. त्यामुळे या मालिकेत न्यूझीलंडचा संघ कसं पुनरागमन करतो हे पाहणं महत्वाचं ठरणार आहे.