विराट कोहलीने झळकावलेल्या नाबाद अर्धशतकी खेळाच्या जोरावर भारताने पहिल्या टी-२० सामन्यात वेस्ट इंडिजवर ६ गडी राखून मात केली. विराटने या सामन्यात नाबाद ९४ धावा करत भारतीय संघाच्या विजयात मोलाचा वाटा उचलला. विराट कोहलीने सर्वप्रथम लोकेश राहुल आणि त्यानंतर ऋषभ पंतसोबत भागीदारी रचत संघाच्या विजयावर शिक्कामोर्तब केलं.

या सामन्यादरम्यान विंडीजचा जलदगती गोलंदाज केजरिक विल्यमस आणि विराट कोहलीमध्ये एक वेगळच द्वंद्व पहायला मिळालं. विराटने कोट्रेलच्या गोलंदाजीवर जोरदार हल्ला चढवत, त्याच्याच ट्रेडमार्क स्टाईलने सेलिब्रेशन करत आपले इरादे स्पष्ट केले.

वेस्ट इंडिजचे खेळाडू हे आंतरराष्ट्रीय क्रिकेटमध्ये त्यांच्या अनोख्या सेलिब्रेशनसाठी ओळखले जातात. केजरिक विल्यम्स हा गोलंदाजी करताना विकेट मिळवल्यानंतर प्रतिकात्मक स्वरुपात फलंदाजाचं नाव आपल्या डायरीत लिहून ते पान फाडण्याचा अभिनय करतो. मात्र विराटने आज विल्यम्सचा डाव त्याच्यावर उलटवत बाजी मारली.