ड्युसेलडर्फ : जागतिक क्रमवारीत तिसऱ्या स्थानावर असलेल्या जर्मनीने चार सामन्यांच्या हॉकी मालिकेतील शनिवारी झालेल्या पहिल्या सामन्यात भारतीय महिला संघाचा ५-० असा धुव्वा उडवला. जर्मनीकडून पिया मार्टेन्स (१०व्या, १४व्या मिनिटाला), लीना मिखिल (२०व्या मि.), पॉलिन हेन्झ (२८व्या मि.) व लिसा अल्टेन बर्ग (४१व्या मि.) यांनी गोल साकारले. पियाने नोंदवलेल्या दोन गोलमुळे जर्मनीने पहिल्या सत्रात २-० अशी आघाडी मिळवली. दुसऱ्या सत्रात भारताने त्वरित प्रतिहल्ला करीत पेनल्टी कॉर्नर मिळवला, परंतु जर्मनीच्या बचावपटूंनी हा प्रयत्न हाणून पाडला. २०व्या मिनिटाला लीनाने पेनल्टी कॉर्नरचे गोलमध्ये रूपांतरण केले. आठ मिनिटांनंतर मध्यरक्षक पॉलिनने केलेल्या गोलमुळे मध्यांतराला जर्मनीकडे ४-० अशी आघाडी होती. तिसऱ्या सत्रात ४१व्या मिनिटाला यजमानांसाठी लिसाने पाचवा गोल केला.
