दुखापतीतून सावरत भारताच्या सौरभ वर्माने आंतरराष्ट्रीय स्पध्रेत दमदार पुनरागमन केले. इंडिया ओपन सुपर सीरिज बॅडमिंटन स्पध्रेच्या पात्रता फेरीत सौरभने जपानच्या केनिची टॅगोवर २१-१८, २१-१२ असा विजय मिळवत मुख्य फेरीत प्रवेश केला. तत्पूर्वी, सौरभने भारताच्याच आर.एम.व्ही. गुरुसाईदत्तचा २१-१८, २१-१० असा पराभव केला. मिश्र दुहेरीत भारताच्या मनू अत्री आणि अश्विनी पोनप्पा यांनी पहिल्या फेरीत सौरव अग्रवाल आणि श्रद्धा तिवारीचा २१-४, २१-८ असा पराभव केला़, तर दुसऱ्या फेरीत पुढे चाल मिळाल्याने त्यांचा मुख्य फेरीतील प्रवेश निश्चित झाला.
