इंग्लंडने दिलेल्या ३२३ धावांचा पाठलाग करताना लॉर्ड्सच्या ऐतिहासीक मैदानावर भारताला पराभवाला सामोरं जावं लागलं आहे. दुसरा वन-डे सामना इंग्लंडने ८६ धावांनी जिंकत ३ सामन्यांच्या मालिकेत १-१ ने बरोबरी साधली आहे. इंग्लंडने दिलेलं आव्हान भारतीय फलंदाजांना झेपलं नाही, त्यातच ठराविक अंतराने भारताच्या विकेट पडत गेल्यामुळे इंग्लंडला सामन्यात विजय मिळवणं शक्य झालं. भारताकडून सुरेश रैना आणि विराट कोहलीने चौथ्या विकेटसाठी केलेली ८० धावांची भागीदारी सर्वोत्तम ठरली. याव्यतिरीक्त एकही भारतीय फलंदाज आपली छाप पाडू शकला नाही. धोनीने आंतरराष्ट्रीय वन-डे कारकिर्दीत दहा हजार धावांचा टप्पा पार केला. मात्र सोबतीला कोणताही खंदा फलंदाज नसल्यामुळे त्यानेही धीमा खेळ करणं पसतं केलं. धोनी माघारी परतल्यानंतर भारताच्या पराभवावर शिक्कामोर्तबच झालं. इंग्लंडकडून सर्वच गोलंदाजांनी चांगल्या गोलंदाजीचं प्रदर्शन करत भारतीय फलंदाजीला वेसण घातली. लियाम प्लंकेटने सर्वाधिक ४ बळी घेतले. तर त्याला आदिल रशिद व डेव्हिड विलीने प्रत्येकी २ आणि मोईन अली, मार्क वूड यांनी प्रत्येकी १-१ बळी घेत चांगली साथ दिली. या मालिकेतला अंतिम सामना मंगळवारी हेडिंग्लेच्या मैदानावर खेळवला जाणार आहे. त्याआधी जो रुटची शतकी खेळी आणि त्याला कर्णधार इयॉन मॉर्गन आणि डेव्हिड विलीने दिलेली भक्कम साथ या जोरावर इंग्लंडने दुसऱ्या वन-डे सामन्यात धावांचा डोंगर उभा केला. पहिल्या डावात इंग्लंडने ७ गडी गमावत ३२२ धावा केल्या. जो रुटने या सामन्यात नाबाद ११३ धावा केल्या. नाणेफेक जिंकून प्रथम फलंदाजी करण्याचा निर्णय घेतलेल्या इंग्लंडने आपल्या डावाची सुरुवात अतिशय सावध पद्धतीने केली. मात्र चांगली सुरुवात केल्यानंतर सलामीवीर जॉनी बेअरस्टो आणि जेसन रॉय माघारी परतले. यानंतर कर्णधार इयॉन मॉर्गन आणि जो रुट यांनी इंग्लंडच्या डावाला आकार दिला. दोघांनीही अतिशय संयमीपणे भारतीय गोलंदाजीचा सामना करत तिसऱ्या विकेटसाठी १०३ धावांची शतकी भागीदारी रचली. या भागीदारीच्या बळावरच इंग्लंडने सन्मानजनक धावसंख्या उभारली. कर्णधार मॉर्गननेही सामन्यात ५३ धावांची अर्धशतकी खेळी केली. मात्र मॉर्गन माघारी परतल्यानंतर मधल्या काळात इंग्लंडचा संघ पुन्हा एकदा बॅकफूटला गेला. मात्र डेव्हिड विलीने अखेरच्या षटकांमध्ये फटकेबाजी करत जो रुटला चांगली साथ दिली. या दोघांमध्ये झालेल्या अर्धशतकी भागीदारीवर इंग्लंडने यशस्वीरित्या ३०० धावांचा टप्पा पार केला. दरम्यान अखेरच्या षटकात डेव्हिड विलीने झटपट धावा घेण्याचा सपाटा लावत आपलं अर्धशतक पूर्ण केलं. अखेरच्या चेंडूवर चोरटी धाव घेण्याच्या नादात विली धोनीच्या अचून फेकीवर धावबाद झाला भारताकडून कुलदीप यादवने सर्वाधीक ३, तर उमेश यादव, हार्दिक पांड्या आणि युझवेंद्र चहल यांनी प्रत्येकी १-१ बळी घेतला.